Niyə millət vəkilləri hədlərini aşırlar?

Bakı/03.08.21/Turan: Necə ola bilir ki, Milli Məclisin deputatı Eldəniz Səlimov polis əməkdaşını döyməyə "özündə cəsarət tapır?” Necə ola bilir ki, bəzi deputatlar özlərini "hegemon" hesab edirlər? Siyasətçi Azər Qasımlın "Çətin sual" proqramında bu və digər sualları cavablandırıb.

Onun sözlərinə görə, İcra Hakimiyyəti başçıları, Milli Məclisin deputatları, rayon daxili işlər şöbələrinin rəisləri özlərini hegemon hesab edirlər. Ona görə ki, onları xalq seçmir, onlar xalqdan qətiyyən asılı deyil və buna görə də istənilən vətəndaşa qarşı istədikləri kimi hərəkət etməyi mümkün hesab edirlər.

Siyasətçi hesab edir ki, bir qayda olaraq, belə hallar mətbuatda, sosial şəbəkələrdə əksini tapmır və ictimaiyyətə çıxarılmır. Bu cür faktların ört-basdır edilməsi ona gətirib çıxarıb ki, hakimiyyət tərəfindən himayə edilən bəzi adamlar üçün bu cür davranışlar tədricən normaya çevrilib.

Qasımlının fikrincə, digər tərəfdən,  baş verən insident hakimiyyətin öz daxilində qarşılıqlı münasibətlər məsələsidir.

"Əgər Milli Məclisin deputatı hər hansı sıravi vətəndaşı döysəydi, ona qarşı zorakılıq aktı törətsəydi, iş İntizam komissiyasına gedib çıxmazdı. Əgər gedib çatsaydı da komissiya deputatın toxunulmazlıqdan məhrum edilməsi barədə rəy qəbul etməzdi. Bu məsələ hətta Milli Məclisin müzakirəsinə çıxarılmayacaqdı. Bundan əlavə, bu, mətbuatda və sosial şəbəkələrdə müzakirə predmeti olmayacaqdı. Məsələ də bundadır ki, münaqişə deputatla polis arasında baş verib. Bu o deməkdir ki, burada söhbət hakimiyyətin qolları – parlamentlə Daxili İşlər Nazirliyi arasında mübahisədən gedir", - o deyib.

Siyasətçi hesab edir ki, bu hadisə KİV və sosial şəbəkələrin mövzusuna çevrilib, ona görə  yox ki, onun şahidləri jurnalistlər və ya blogerlər olub, ona görə ki, bu, Daxili İşlər Nazirliyində narahatrlıq yaradıb.

Qasımlı əmindir ki, hakimiyyət buna münasibət göstərə bilmədi, çünki bu, onun öz mahiyyətindən irəli gəlir. Əgər kimsə polisi döyürsə, xüsusən də hakimiyyətin başqa bir qolunun nümayəndəsidirsə, bu, anarxiyaya doğru birbaşa yoldur. Görünür, heç bir hakimiyyət, xüsusən də avtoritar buna dözə bilməz. Ona görə də şübhə yoxdur ki, deputatı cəzalandıracaq və mandatından məhrum edəcək.

Qasımlının sözlərinə görə, bu, deputatların belə biabırçı davranışı ilə bağlı yeganə hadisə deyil və artıq qeyd edildiyi kimi, onunla izah olunur ki, onları xalq seçmir, onları təyin edirlər.

"Eldəniz Səlimov ilk olaraq prezidentdən üzr istəyib, sonra hakim partiyadan, parlamentdəki həmkarlarından (deputatlar) və son xalqdan.

Axı prezident  İcra Hakimiyyətinin başçısıdır, deputat isə parlamentin – qanunvericilik orqanının üzvüdür və buna görə də prezidentdən üzr istəmək formal baxımdan çətin ki yerinə düşür. Demokratik ölkədə belə şey mümkün olmazdı. Amma məsələ də elə bundadır ki, mandatı ona prezident verib. Məhz buna görə də Səlimov ondan üzr istəyir", - Qasımlı fikrini yekunlaşdırıb.—0—