Ölkəyə giriş-çıxışa məhdudiyyətləri məhkəmələr müəyyən etməlidirlər

Bakı/12.03.21/Turan: “Ölkəyə giriş-çıxışı kimlər məhdudlaşdıra bilər?”  “Çətin sual” verilişinin 2021-ci il 12 mart buraxılışının əsas mövzusu belə olub.

Verilişin qonağı hüquqşünas Səməd Rəhimli ombudsman Səbinə Əliyevanın bu günlərdə parlamentə təqdim etdiyi məruzəsinin bəzi məqamlarına münasibətini ifadə edib.

Hüquqşünas vətəndaşların ölkədən giriş-çıxışlarına qoyulan qadağalara, vəkillik institutunun fəaliyyətinə öz mövqeyini bildirib.

Səməd Rəhimli deyib ki, ombudsmanın məruzəsində vətəndaşların ölkəyə giriş-çıxışına ancaq məhkəmə qərarı ilə qadağa qoyula biləcəyi bildirilir.

Vəkillik institutunun fəaliyyətinə gəlincə, ombudsman burada bəzi maneələrin

aradan qaldırılmasını təklif edir.

Səməd Rəhimli hesab edir ki, təklif yaxşıdır və qəbul edildiyi halda vətəndaş ən azı öncədən ölkədən çıxışına maneə olduğunu biləcək.

“Yoxsa, indiki halda hüquq- mühafizə orqanları qadağanı tətbiq edir, vətəndaşın isə  xəbəri olmur, problemlər yaranır. Hətta məhkəmə işinə şahid kimi cəlb edilən adamların ölkədən çıxışlarına qadağa tətbiq olunur. Təklif qəbul olunduğu halda vətəndaş  məhkəmə vasitəsilə vəziyyətdən vaxtında xəbər tuta biləcək, maddi  kimi itkilərə məruz qalamayacaq”, - Səməd Rəhimli bildirib.      

Onun fikrincə təklif çoxdan olmalı idi və onu uğurlu saymaq olar, həm də bunun təmin olunması üçün etibarlı mexanizmlər hazırlanmalıdır.

Səməd Rəhimli Vəkillər Kollegiyasına üzvlüyə qəbulla bağlı təkliflərə də toxunub.

Hüquqşünas vəkillik fəaliyyəti üçün 3 il stajın tələb olunmasını əsaslı saymır, bunun ləğv olunmasını və ya bir ilə endirilməsini dilə gətirir. Birillik stajla vəkillik institutunun yaradılmasını təklif edir.

Onun fikrincə, fəlsəfə elmləri doktorları üçün yazılı imtahan da, eyni zamanda şifahi imtahanlar da ləğv olunmalıdır, test imtahaınından keçmək yetərlidir. Səməd Rəhimliyə görə, dövlət qulluğunda 7 il fasiləsiz hüquqşünas kimi fəaliyyət göstərmiş şəxslərin şifahi imtahanla vəkilliyə keçməsi də yolverilməzdir.

Hüquqşünas hesab edir ki, əslində bu yolla vəkil qıtlığını aradan qaldırmaq istəyirlər, bu da müstəqil olmayan şəxslərin vəkilliyə gətirilməsi deməkdir. Ona görə bu, heç də vəkil peşəkarlığını artırmır, əksinə ona ziyan vurur.

Onun fikrincə, vəkillik sahəsində peşəkarlığı artırmaq üçün bir neçə il öncə ləğv edilmiş nümayəndəlik institutunu bərpa etmək lazımdır. -05D-