Qubad İbadoğlu: Uşaqpulunun verilməsi üçün kifayət qədər imkan var

Bakı/06.04.21/Turan:  Azərbaycan dövlətinin uşaqlara uşaqpulu ödəmək imkanı var, sadəcə buna istək olmalıdır.  Bunu iqtisadçı alim, “Azərbaycan Rifah və Demokratiya” Hərəkatının rəhbəri Qubad İbadoğlu Turan-ın “Çətin sual” proqramının 2021-ci il aprelin 5-də “Uşaqpulları niyə verilmir?” mövzusuna dair buraxılışında bildirib.             

İbadoğluna görə, uşaq pullarının verilməməsi dövlətin konstitusion, sosial öhdəliklərini yerinə yetirmək istəməməsi anlamına gəlir. Bu, həm də Azərbaycanın üzv olduğu BMT-nin Uşaq Hüquqları Konvensiyasının müddəalarını yerinə yetirməmək deməkdir.

İbadoğluna görə, bu, təkcə sosial-iqtisadi məsələ deyil, bunun həm də ideoloji, hüquqi aspekti var və özünü sosial elan edən dövlətlər uşaqpulunu ödəyirlər. “Uşaqpullarının ödənilməsi ələbaxımlılıq məsələsi deyil, bu, həm də gələcəyə qoyulan sərmayədir. Odur ki, uşaqpullarının ödənilməsi vacib məsələdir. Məsələnin maliyyə tərəfinə gəlincə, bu, artıq hökumətin vəzifəsidir”, deyə Q.İbadoğlu bildirir.

Məsələnin hüquqi tərəfinə toxunan Q.İbadoğlu deyir ki, bu, uşaq hüquqları ilə bağlıdır və həm də uşaqpullarının ödənişi ailə-dövlət bağlarının gücləndirilməsi deməkdir.

Alim əlavə edir ki, 01 yanvar 2020-ci il tarixə Azərbaycanda 401249 uşaq ünvanlı sosial yardım alır və bu, ayda hər uşağa  118,4  manat vəsait ödənişi deməkdir.  

İbadoğlu vurğulayır ki, Azərbaycanda 01 yanvar 2020-ci il tarixə  0-17 yaşlı  2 milyon  636 min uşaq var. Bunun 400 min nəfərdən çoxu ünvanlı sosial yardım alır. Yerdə qalan 2 milyon uaşağa ayda 100 manat uşaqpulu ödənilərsə, bu, ildə 2,4  milyard manat vəsait tələb edir: “Fikrimcə, bu, Azərbaycan dövləti üçün böyük vəsait deyil. Onsuz da investisiya qoyulması, tikinti, xarici borca xidmət adı ilə vəsaitlərin çoxu oğurlanır, mənimsənilir. Tikintiyə qoyulan vəsaitin 70%-i mənimsənilir. Ona görə ki, icra hakimiyyətinin fəaliyyətinə vətəndaş cəmiyyətinin, parlamentin nəzarəti yoxdur. Büdcəyə vergi ödənişlərinin həcmi bilinmir, bu, leqallaşmalıdır. Yəni, məsələyə ciddi yanaşılsa uşaqpullarını ödəyə bilmək üçün kifayət qədər vəsait ayırmaq olar”, deyə alim bildirib.