Qubad İbadoğlu: «Vətəndaş Cəmiyyəti Forumu hökumət üçün şansdır»

  Vətəndaş Cəmiyyətini Müdafiə Komitəsinin təşəbbüsü ilə aprelin 19-da Bakı Beynəlxalq Mətbuat Mərkəzində vətəndaş cəmiyyətinin forumu keçiriləcək. Forumda QHT, KİV, siyasi məhbuslar və digər məsələlər müzakirə olunacaq.

Forumun keçirilməsinin təşəbbüsçüsü “Demokratiya və Rifah” Hərəkətanın sədri  Qubad İbadoğlu “Çətin sual” (www.contact.az) proqramına müsahibəsində deyib ki, Azərbaycanın vətəndaş cəmiyyəti keçid dövrünü yaşayır – hökumətin bir neçə il QHT-lərə təzyiqlərindən sonra müsbət dəyişiklik nəzərə çarpmağa başlayıb  ki, bu da bir sıra QHT-nin bank hesablarına qadağaların, vətəndaş sektoru nümayəndələrinin ölkədən çıxışına qoyulan qadağanın aradan götürülməsi ilə xarakterizə olunur.

Əlbəttə, bu, beynəlxalq birliyin təzyiqlərinin artması şəraitində baş verir. Belə ki, iqtisadi böhranla üzləşən Azərbaycan hökumətinin dəstəyə ehtiyacı var, Q.İbadoğlu bildirib.

O xatırladıb ki, Azərbaycan hökuməti iki beynəlxalq təşəbbüsdə - Hasilat Sənayesində Şəffaflıq Təşəbbüsü (EITI) və “Açıq hökumət” tərəfdaşlığında (OGP) öz mövqeyini itirib. Ötən ilin aprelində EITI ölkənin statusunu üzvlükdən namizədliyə endirib, OGP isə apreldə statusun namizəd səviyyəsinə endirilməsini təklif edib. Bütün bunlar ölkəni həmin təşəbbüslərdən məhrum olmaq təhlükəsi ilə üz-üzə qoyur. Belə olan halda hökumət beynəlxalq maliyyə dəstəyi və investisiyaların cəlb edilməsi ilə bağlı böyük problemlərlə üzləşəcək.

Mayda və iyunda hər iki təşəbbüsün rəhbər orqanları Azərbaycan hökuməti ilə gələcək münasibətləri müzakirə etməli olacaq. OGP-nin iclası 3-5 may tarixlərində CAR, EITI –nin 1-2 iyun tarixlərində Polşada keçiriləcək.

Q.İbadoğlunun sözlərinə görə, hökumətə əsas iradlar QHT-ə, KİV-ə təzyiqlər, hökumətin fəaliyyətinə xüsusən şəffaflıq sahəsinə nəzarətdə vətəndaş cəmiyyətinin iştirakının bərpası olacaq. Bu isə bütün qanunverici və siyasi əngəllər aradan qaldırılmadan mümkün deyil.

Q.İbadoğlu həmçinin qeyd edib ki, hər iki qurum bəzi   suallara cavab gözləyir: Niyə indiyədək şəffaflıq sahəsində milli fəaliyyət planı yoxdur və niyə onun hazırlanmasına QHT-lər cəlb olunmayıb?

Əsasən Varşavada 100-dən çox QHT və KİV-in iştirakı ilə qanunvericiliyin vəziyyəti, siyasi məhbuslar məsələsi, QHT-nin durumu, söz azadlığı sahəsində vəziyyət müzakirə olunacaq.

“19 aprel forumunda biz hökumətə təklif edəcəyik ki, QHT-lərin fəaliyyətinə məhdudiyyətlər aradan götürülsün. QHT-lərin işinin əvvəlki rejimdə bərpası Azərbaycan üzrə şəffafflıq sahəsində beynəlxalq qurumların qərarlarına müsbət təsir göstərəcək”, - o vurğulayıb.

Q.İbadoğlu hesab edir ki, QHT-lərlə bağlı mürtəce qanunvericilik ləğv edilməliir və xarici donorların əvvəlki rejimdə fəaliyyəti bərpa olunmalıdır.

İki il öncə QHT-nin yanvar forumundan sonra vətəndaş cəmiyyətinə güclü təzyiqlər başladı. Odur ki, 19 aprel forumuna hökumətin nə kimi müsbət reaksiyası ola bilər? Bu sualın cavabında Q.İbadoğlu deyib ki,   vətəndaş cəmiyyəti dövlətin mühüm ayrılmaz hissəsidir və bütün proseslərdə fəal iştiraka cəlb olunmalıdır.

“Biz vəziyyətin çətinliyini başa düşürük. Problemlərin həllindən ötrü hökumətin iştirakı ilə debatlar keçirilməlidir.  Şəffaflıq sahəsində beynəlxalq təşkilatların inamının bərpa edilməsi üçün bu şansdan istifadə etmək hökumətin marağındadır”, - Q.İbadoğlu qeyd edib.

O həmçinin deyib ki, hökumətdə də həm mütərəqqi, həm də konservativ düşüncəli insanlar var və konstruktiv hissə ilə dialoq qurmaq vacibdir.—0—