Tehran niyə gərginliyi artırır?

Bakı/05.10.21/Turan: Azərbaycan prezidenti İlham Əliyev Cəbrayıla dünənki səfəri zamanı İranın ali siyasi və hərbi rəhbərliyinin Azərbaycanın əleyhinə bir sıra bəyanatlarına reaksiya verib.

Bundan öncə ötən bazar günü İranın dini lideri Əli Xameneyi Hərbi Məktəbin məzunları qarşısında çıxış edərkən bildirib ki, İranın şimal-qərbində və bəzi qonşu ölkələrdə baş verən hadisələr xarici dövlətlərin hərbi müdaxiləsi olmadan həll olunmalıdır.

Xameneyinin ardınca İranın xarici işlər naziri Abdullahi çıxış edib. O, yerli televiziyaya müsahibəsində deyib: "Biz İran sərhəddinin yaxınlığında saxta sionist rejimin mövcudluğuna və onun təxribatçı hərəkətlərinə, həmçinin regionda və onun sərhədlərində geosiyasi dəyişikliklərə heç vaxt dözməyəcəyik".

Prezident İlham Əliyev bu ittihamlara cavab verərək bildirib ki, Azərbaycan müstəqil siyasət yürüdür və öz qonşuları ilə münasibətlərini bu əsaslarla qurur.

O, İran rəhbərliyini böhtanda ittiham edib və sübut tələb edib.

Siyasi şərhçi Sədrəddin Soltan "Çətin sual" proqramında Azərbaycan və İran arasındakı ziddiyyətləri şərh edib.

Ekspertin fikrincə, iki ölkə arasında gərginliyin artmasına səbəbi İranın Azərbaycanı idarə oluna biləcək ölkə kimi qəbul etməməsidir. İran 30 ildir ki, bunu manipulyasiyalar vasitəsilə etməyə çalışır və Ermənistandan bu manipulyasiyaların aləti kimi  istifadə edir.

Soltan hesab edir ki, İranın xarici siyasətinin əsasını "İsrailə ölüm!" və "Amerikaya ölüm!" şüarları altında sionizmə qarşı mübarizə haqda tezis təşkil edir. Bununla yanaşı, ekspert bildirir ki, Tehranda əmindirlər ki, ABŞ və İsrail Azərbaycanı işğal ediblər. Buna görə də İran İraq və Suriyada olduğu kimi, Azərbaycanda da SEPAH-İİKK (Sepah-e pasdaran-e enqelab-e Eslami – (İslam İnqilabı Keşikçiləri Korpusu) silahlı birləşmələrinin olmasını istərdi.

"Bir sözlə, İran Azərbaycanı həm siyasi, həm də hərbi baxımdan özündən asılı görmək istəyir. Bu, mümkün olmayanda isə təzyiq göstərməyə çalışır", - Soltan bildirib.—0—