“Yeni deyilən, elə əsl köhnədir” - ekspert

Bakı/28.04.21/Turan: “Bu günlərdə Mərkəzi Seçki Komissiyasının (MSK) tərkibinin yenidən formalaşdırılması ölkənin siyasi həyatında yeniliklərə səbəb ola bilməyəcək, çünki formal olaraq vəzifələrə şəxslər seçildilər. Hər hansı yeniliklər ola biləcəyini gözləmirəm”. Demokratik Təşəbbüslər İnstitutunun (DTİ) rəhbəri Akif Qurbanov bunu Mərkəzi Seçki Komissiyasının yenidən formalaşdırılması ilə bağlı Turan-ın “Çətin Sual” proqramının aprelin 28-də efirə getmiş buraxılışında bildirib.

Qurbanov hesab edir ki, yeni deyilən Mərkəzi Seçki Komissiyası elə əslində köhnə Mərkəzi Seçki Komissiyasıdır, sadəcə şəxslər yenidən bu quruma seçiliblər, prinsiplər, baxışlar və s. elə köhnə olaraq qalır: “Burada istər hakimiyyətin, istər bitərəflərin, istər müxaliflərin maraqlarını müdafiə edənlər olsun, yerlər dəyişsə də, mahiyyət dəyişmir. Formal olaraq görünür ki, hansısa bölgülər var, əslində isə hamısı eyni ölçü-biçilidir, azlığı qoruyanlar hakimiyyəti, hakimiyyəti qoruyanlar bitərəfləri müdafiə edər, heç nə də dəyişməz. Çünki prinsiplər müəyyən deyil”, deyə Demokratik Təşəbbüslər İnstitutunun rəhbəri fikrini bildirir.      

Qurbanov deyir ki, hər seçkidə nə qədər pozuntular olur, Avropa Məhkəməsinə işlər göndərilir, son nəticədə hökumət kompensasiya ödəməklə işi bağlamış olur, ondan artıq hər hansı bir tədbir görülmür.  

Qurbanov vurğulayır ki, neçə illərdir ki, hakimiyyətdən seçki komissiyalarının paritet əsasda formalaşdırlması, proporsional seçkinin bərpa olunması tələb edilir, hökumətsə özünü “eşitməməzliyə” vurur və buna əməl etmir.

Demokratik Təşəbbüslər İnstitutunun rəhbərinin fikrincə, hökumətin 2009-cu ildən bu yana seçki sahəsində apardığı “islahatlar” kimlərəsə və hansısa qüvvələrə hakimiyyət səlahiyyəti verilməsini nəzərdə tutmur, əslində hakimiyyəti bir əldə cəmləşdirməyi nəzərdə tutur.   

Onun fikrincə, elə bundan da irəli gələrək, Mərkəzi Seçki Komissiyasında hansı qüvvənin hansı maraqları müdafiə etməsindən aslı olmadan elə “hamı bir-birini” müdafiə edir, hakmiyyət, müxalifət, bitərəf maraqları anlayışı belə formal xarakter daşıyır.

Qurbanova görə, bu tərkibin Azərbaycanda seçki adına hansısa uğurlara imza atacağına inanmır, çünki prinsipiallıq yoxdur, maraqların qorunması belə gözdən pərdə asmaq üçündür.

O, bəzi məsələlərə də diqqəti cəlb edib və bildirib ki, Mərkəzi Seçki Komissiyasında Yeni Azərbaycan Partiyasının marağını təmsil edən şəxs var ki, patiyada daşıdığı vəzifədən istefa verməyib, bu isə komissiyada yer tutmaqla daban-dabana ziddir.

Qurbanov hesab edir ki, “müxalifətlə dialoq” məsələsi hökumətin özünü dünyaya sivil hökumət kimi təqdim etmək istəyinə hesablanıb. Çünki, hakimiyyət cəmiyyəti maliyyə, büdcə, hüquq-mühafizə qüvvələri ilə idarə edir. Dialoq məsələsi isə artıq müxalif qüvvələrin də hakimiyyət tərəfindən idarə edilməsinin göstəricisidir.

Qurbanova görə, bu vəziyyətdən çıxış və uğur qazanmağın yolu isə prinsipiallıqdan, qüvvələrin seçdikləri prinsiplərə bağlılıqdan keçir. Həm də bu yöndə uğur qazanmağın digər yolu xalqın özünü demokratik siyasi mübarizəyə hazırlamaqdan keçir. -05B-