![ABŞ səfiri Millz Paşinyanın Qarabağ kartlarını qarışdırıb](https://turan.az/resized/750/500/resize/media/2018/main/101800014121.jpg)
Millz EVN Report-a müsahibəsində deyib ki, "müəyyən ərazilər qaytarılmasa" Qarabağ probleminin həlli mümkün deyil.
"İlk dəfə bura gəldiyimdə məlum olanda ki, mənimlə görüşən ermənilərin çoxu danışıqlar prosesinin bir hissəsi kimi işğal edilmiş ərazilərin qaytarılmasının əleyhinədir, təəccübləndim. Məni o fakt təəccübləndirir ki, Ermənistanda demək olar ki, məqbul qərar və kompromislərlə bağlı müzakirələr aparılmır. Uzun illər mənim hökumətimin təsəvvürü belə olub ki, bu ərazilər ona görə işğal edilib ki, sonradan "ərazi müqabilində status" formulu üzrə istifadə olunsun. Mən bu variantın artıq dəstək almadığına heyrətləndim", -R.Millz bildirib.
O deyib ki, 2016-ci il aprel müharibəsinin bu qavramanı kəskinləşdirdiyini başa düşür. "Ancaq amansız reallıq ondan ibarətdir ki, işğal edilmiş müəyyən ərazilər qaytarılmadan nizamlanma mümkün deyil",- öz səlahiyyətlərini başa vuran ABŞ səfiri vurğulayıb.
Yerevan jurnalistləri Millzin mesajı ilə bağlı yerli ekspertlərin və digər ölkələrin səfirlərinin fikirlərini öyrəniblər.
Fransanın Ermənistandakı fövqəladə və səlahiyyətli səfiri Conatan Lakott News.am-a bildirib: "Fransanın mövqeyi dəyişməzdir. Biz insanların ölümündən məyus oluruq və münaqişənin ATƏT-in Minsk Qrupu formatında danışıqlar yolu ilə həllinə ümid edirik".
Demokratik bloka daxil olan digər ölkələrin səfirləri Millzin bəyanatını şərh etməyiblər.
Rusiya XİN mətbuat katibi Mariya Zaxarovanın timsalında Millzin vida niqtinin bütün bəndləri (o, Ermənistanda demokratiyanın perspektivi ilə fikirlərini bildirib, yerli vətəndaş cəmiyyətinə tövsiyələr verib v s.) ilə bağlı qəzəbli narahatlığını bildirib, ancaq Qarabağ nizamlanması ilə bağlı səfirin sözlərini diqqətdən kənarda qoyub. Halbuki, səfirin çıxışının bu hissəsi hazırda Ermənistan mətbuatını daha çox maraqlandırır. M.Zaxarovanın sözlərinə görə, Millzin çıxışı "primitiv birbaşalıq"dır.
Rusiyanın Qarabağ nizamlanması ilə bağlı mövqeyi dəyişməz qalır. Bunu Rusiyanın Ermənistandakı səfiri Sergey Kopırkin çərşənbə axşamı "Novosti-Ermənistan" agentliyinə müsahibəsində bildirib. O, ABŞ səfiri Riçard Millzin bəyanatı fonunda Minsk Qrupunun həmsədr ölkələrinin mövqeyində mümkün dəyişikliklərlə bağlı sualın cavabında deyib: "Bizim mövqeyimiz dəyişməz olaraq qalır: nizamlanma dinc yolla olmalı, hər iki tərəfin maraqlarına əsaslanmalıdır. Bu gün Minsk Qrupuna alternativ görmürük. Ancaq təkrar edirəm ki, məsələnin həlli, sözsüz ki, tərəflərin öz işidir. Bizim rolumuz sabitliyin olmasına, sülhün qorunmasına yardım etməkdir. Elə etməliyik ki, tərəflər qarşılıqlı məqbul həllə doğru mümkün qədər tez irəliləsinlər".
Ermənistan KİV və ictimai xadimlər Millzə qarşı çıxıblar. Moskvanın "Kafkazskiy uzel" nəşrində "Yerevantsı" adlı blogerin postu istehza-mənfi məcradadır. Onun Ermənistandan olan oxucularından biri Millzin erməni mentalitetini bilməməsinə təəccüblənib. Qəzəblənmiş digər oxucular da istənilən ərazinin Azərbaycana qaytarılmasının əleyhinə olublar.
Paşinyana yaxın "Lragir" saytında keçmiş səfirdən narazılıqla sitat gətirilib. Redaksiya diplomatın həyəcanlı mesajını kənarda saxlayaraq, onun bəyanatını Azərbaycana hər hansı ərazinin qaytarılmasının mümkünsüzlüyü barədə Amerikanın konstatasiyası kimi təqdim edib.
Bu yazının Bakı üçün təhlükəli hissəsi Trampın "hər şeyi olduğu kimi saxlamaq" formulunda əksini tapan siyasəti haqda xatırlatmadır. Paşinyanpərəst KİV-ə görə, bu formula əsasən Qərb Azərbaycanın işğal edilmiş əraziləri üzərində Ermənistanın hüququnu tanımağa hazırdır.
Ermənistanın keçmiş ombudsmanı və hüquq müdafiəçisi Larisa Alaverdyan deyib ki, Millzə təşəkkür etmək lazımdır, çünki ona öz ölkəsinin hakimiyyətinin rəsmi səviyyədə səsləndirə bilmədiyi mövqeyi bildirməyə fürsət verilib. L.Alaverdyan növbəti dəfə Madrid prinsiplərini kəskin tənqid edərək onları qəbuledilməz adlandırıb.
Rəsmi Yerevan səfir Millzin səsləndirdiyi ABŞ-ın Qarabağa dair mövqeyini hökumət başçısının səlahiyyətlərini icra edən N.Paşinyanın qəribə frazası ilə ifadə edib. O, Millzin bəyanatına "getməkdə olan səfirin" fikirləri kimi yanaşmağı məsləhət görüb. Sanki bilmir ki, "keçmiş diplomatlar olmur".
"Ermənistanın Dağlıq Qarabağ münaqişəsinin nizamlanmasına dair mövqeyi dəfələrlə qeyd olunub və ölkə hökumətinin proqramında əksini tapıb", - Ermənistan XİN mətbuat katibi Anna Naqdalyan ABŞ səfiri Riçard Millzin bəyanatını şərh edərkən bildirib.
Rəy yaz