Gürcüstan QHT-ləri Saakaşvilinin qayıtması ümidi ilə dövlət reyestrini boykot edir

Gürcüstanda qeyri-hökumət təşkilatlarının “Xarici agentlər haqqında Rusiya qanunu” adlandırdıqları “Xarici təsirə qarşı mübarizə haqqında” qanunun qüvvəyə minməsindən iki ay keçir.

Qanun xaricdən maliyyənin 20%-dən çoxunu alan bütün Gürcüstan QHT-lərindən Ədliyyə Nazirliyində qeydiyyatdan keçməyi və gəlir mənbələri və layihələrinin məqsədləri haqqında hər il hesabat verməyi tələb edir, tələblər yerinə yetirilmədikdə isə onlar inzibati və ya cinayət məsuliyyəti təhlükəsi ilə üzləşəcəklər.

“Güclü Gürcüstan”ın lideri Mamuka Xazaradze sosial şəbəkədə bildirib ki, iki ay ərzində Gürcüstanda QHT-lərin cəmi bir yarım faizi Ədliyyə Nazirliyinin reyestrində qeydiyyatdan keçib.

“Rus qaydaları və qanunları ilə yaşamaqdan imtina edən hər kəsi salamlayıram. Gürcüstan Gürcüstandı, Rusiya deyil!”, - deyə o yazıb.

İmtina edənlər arasında “Təmənnasız Qan Donorları”, “Ədalətli Seçkilər və Demokratiya Uğrunda Beynəlxalq Cəmiyyət”, Qadın hüquq müdafiə təşkilatı “Sapari” QHT-ləri də var, sonuncu Rusiya qanunları əsasında dövlət tərəfindən yaradılan reyestrdə qeydiyyatdan keçmək niyyətində olmadığını bildirdi.

“Biz Gürcüstanın digər qeyri-hökumət təşkilatlarının böyük əksəriyyəti kimi ədalət uğrunda mübarizəmizi davam etdiririk. Biz qadınlara və uşaqlara kömək etmək qadağasını qəbul etməyəcəyik. Biz işləməyə və yenidən zorakılıqla üzləşən insanlara kömək etməyə davam edirik”, - “Sapari”də bildiriblər.

Ölkənin Ədliyyə Nazirliyinin məlumatına görə, “xarici agentlər” reyestrində qeydiyyatdan keçmək üçün 360-a yaxın təşkilat müraciət edib.

Qanunun boykot edilməsi həm də Gürcüstanda oktyabrın 26-da xalqın yenidən İvanişvilinin partiyası ilə eks-prezident Saakaşvilinin bayrağı altında partiyalar bloku arasında seçim edəcəyi parlament seçkilərinin yaxınlaşması ilə izah olunur.

Gürcü ictimai fəalları əmindirlər ki, Saakaşvilinin siyasi qüvvəsi hakimiyyətə qayıdarsa, “Şəffaflıq haqqında...” qanun ləğv ediləcək.

“Biz hakimiyyətə gələn kimi koalisiya tərəfdaşlarımızla birlikdə pensiya kreditlərinin ləğvi, məktəblərdə uşaqların pulsuz yeməklə təmin edilməsi, gürcü ana və nənələrini ölkəyə geri qaytaracaq milyard dollarlıq Mixail Saakaşvili fondunun yaradılması üzərində işləyəcəyik”, "Vahid milli hərəkatın" sədri Tina Bokuçava bildirib.