37 faiz Azərbaycanda yenidən parlamentin legitimliyi mübahisəsi yaradıb

Azərbaycan Mərkəzi Seçki Komissiyası (MSK) sentyabrın 1-də keçirilən növbədənkənar parlament seçkilərində seçici fəallığını 37 faiz açıqladı. Amma bəzi müşahidəçilərin iddiasına görə, əslində seçici fəallığı reallıqda 10-15 faiz civarında olub. Ötən parlament seçkilərində isə həmin rəqəm bundan təqribən 10 faiz yüksək olmuşdu.

2000-ci illərin əvvəllərində Azərbaycanda parlament seçkilərində kvorum ləğv edilib. O vaxt bu məsələ geniş müzakirələrə səbəb olmuşdu və hətta parlamentin legitimliyi ilə bağlı müəyyən mübahisələr doğurmuşdu. Həmin dövrdən bəri bir qayda olaraq, ölkədə parlament seçkilərində prezident seçkiləri ilə müqayisədə fəallıq aşağı açıqlanır. Amma bu seçkilərə qədər bu rəqəm rəsmi olaraq belə aşağı olmamışdı.

İndi bəzi təhlilçilər yenidən legitimlik məsələsini önə sürürlər. Onlar düşünür ki, belə şəraitdə parlamentin siyasi və sosial məsələlərə təsir gücü də aşağı düşür.

Amma MSK-nın ilkin siyahısında parlamentdə yerlərin yarıdan çoxunu qazanan hakim Yeni Azərbaycan Partiyasının (YAP) təmsilçisi Elman Nəsirovun Turana bildirib ki, seçim xalqın seçimidir və bu seçimdə də o insanları seçirlər ki, onlar ilk növbədə xalqın, dövlətin maraqlarına xidmət göstəriblər: “Belə olan vəziyyətdə bütün sferalar üzrə: həm xarici siyasət, həm iqtisadiyyat və sosial, mədəniyyət sahələr üzrə kifayət qədər təcrübəli, peşəkar insanlar parlament seçkilərinin açıqlanan nəticələrə görə öz dairələrində liderdilər”.

E.Nəsirovun fikrincə, həmin şəxslərin fəaliyyəti ilə tanış olduqda dərhal məlum olur ki, parlamentdə xarici siyasətlə məşğul olan iqtisadiyyat sahəsində həm nəzəri, həm praktiki bilikləri olan insanlar var, mədəniyyət sahəsində geniş bilik və bacarıqlara malik şəxslər təmsil olunur: “İndidən demək olar ki, VII çağırış parlament kifayət qədər bilikli, savadlı, təcrübəli, vətənpərvər insanların cəmləşdiyi bir parlament olacaq. İstənilən halda bir həqiqət var: xalqın gözü tərəzidir. Seçən odur və xalqın seçiminə hörmətlə yanaşmaq lazımdır”. 

Müxalifətdən bu seçkilərə 20-dən çox namizədlə qatılan, amma ilkin rəsmi məlumata görə, bir dairədə belə liderlik əldə edə bilməyən Müsavat Partiyasının başqan müavini Mustafa Hacıbəyli isə AzadlıqRadiosuna bildirib ki, öz müşahidələrinə görə, bəzi dairədə seçici fəallığı 10 faizdən də aşağı olub: “Bunun əsas səbəbi əhalidə seçkilərə inamın olmamasıdır. İndiyə qədər dəfələrlə seçkilər saxtalaşdırıldığı üçün əhali seçkiyə inanmır və seçkiyə gəlmir. Gələn 10 faizin də təxminən yarısını biz inandırmışdıq ki, seçkilərə gəlsin, qalan o biri yarısı da hökumətin inzibati resurs vasitəsilə cəlb etdiyi insanlar idi”.

M.Hacıbəyli qeyd edib ki, seçkiqabağı şərait pis idi: “Seçkidə debat olmadı, seçkidə sorğular keçirilmədi. Seçkiqabağı demokratik şəraiti olmadığı, hətta seçki dövründə siyasi həbslər davam etdiyi üçün ölkədə xof ab-havası davam etdi və bu xof ab-havası altında keçirilən seçkidə əhalinin aktiv olmaması təbiidir”.

O, hesab edir ki, bu səbəbdən seçkilər legitim sayıla bilməz: “Müsavat Partiyası seçkilərin yenidən keçirilməsini, ölkədə demokratik ab-havanın yaradılmasını, siyasi məhbusların azadlığa buraxılmasını tələb edir”.

M.Hacıbəyli vurğulayıb ki, qanunvericiliklə Azərbaycanda parlamentin səlahiyyətləri minimuma endirilib. Amma onun fikrincə, bununla belə, əgər parlamentdə həqiqətən də xalqı, Azərbaycanın dövlət maraqlarını təmsil edən, saxta yolla seçilməyən müstəqil deputatlar olardısa, onda parlamentin ölkənin siyasi kursuna təsiri artardı.

Siyasi şərhçi Şahin Cəfərli isə hesab edir ki, əgər seçki saxtakarlığı baş veribsə, bu, hakimiyyətin mənimsənilməsi deməkdir və Konstitusiyaya əsasən xalqa qarşı ən ağır cinayətdir: “Belə fikirləri tez-tez eşidirik ki, xalq niyə etiraz etmir, nə üçün vəziyyətlə barışıb oturur. Mən bu rəylərlə razı deyiləm. Azərbaycan xalqı seçkiyə getməməklə, əslində, öz etirazını ortaya qoymuş olur. Hələ ki, mümkün təhlükəsiz etiraz növü seçki adlanan tamaşanı “görməmək”, bu prosesdən yayınmaq olduğu üçün xalq bu yola, yəni passiv boykota üstünlük verir”.

Ekspertin sözlərinə görə, seçkidə iştirak faizini 37 faiz yazmağa məcbur oldular: “Əslində, ölkə üzrə ümumi iştirak heç 7 faiz də olmayıb. Bu, bariz şəkildə legitimlik problemi yaradır”.

Onun fikrincə, xalq ölkədə dürüst seçkilərin keçiriləcəyinə, onun iradəsinə hörmət göstəriləcəyinə inamını itirib: “Seçki günü hadisələr işğaldakı ərazilər azad olunduqdan sonra hakimiyyətin nüfuzunun artdığı barədə rəyləri də boşa çıxarır. Bu həngaməni sanksiyalaşdıranlar özləri bu qənaətə ciddi əsas yaradır”.

ATƏT-in Demokratik Təsisatlar və İnsan Haqları Bürosunun sentyabrın 2-də açıqlanan ilkin hesabatında isə vurğulandı ki, mövcud şərtlər seçkilərin demokratik standartlara uyğun keçirilməsinə imkan verməyib.