Pompeo İranı nüvə proqramlarını davam etdirməkdə ittiham edir

Bakı/01.05.18/Turan: Dövlət Departamenti dövlət katibi Mayk Pompeonun İsrailin əldə etdiyi İranın nüvə proqramlarını davam etdirməsini təsdiq edən sənədlərlə bağlı bəyanatını yayıb.

"Uzun illər ərzində İran rejimi israrla bütün dünyaya nüvə proqramının sülh xarakteri daşıdığını bəyan edirdi. İsrailin İranın daxilindən əldə etdiyi sənədlər göstərir ki, İran rejimi həqiqəti demirdi. ŞƏxsən mən İran fayllarının əksəriyyəti ilə tanış oldum. Yayılmama sahəsində mütəxəssislərimiz və kəşfiyyat xidmətinin əməkdaşları on minlərlə səhifəni təhlil edir və fars dilindən tərcümə edir. Bu analitika işi bir neçə ay davam edəcək. Biz belə bir nəticəyə gəldik ki, tədqiq etdiyimiz sənədlər orijinaldır", deyə Pompeo bildirib.

Dövlət katibi qeyd edib ki, sənədlər İranın uzun illər ərzində nüvə silahı yaradılması üzrə məxfi proqram həyata keçirdiyini göstərir. İran nüvə silahları və raket sistemləri istehsal etməyə can atırdı. İran bu günə qədər böyük nüvə arxivini bütün dünyadan və MAQATE-dən gizlədirdi.

Pompeo hesab edir ki, İranla nüvə sazişinin nöqsanları arasında İranın hərbi nüvə proqramı ilə bağlı qanunsuz fəaliyyətinə məhəl qoyulmaması olub.

"Uzun illər ərzində İran hakimiyyətinin öz fayllarını MAQATE-nin beynəlxalq müfəttişlərinə vermək və nüvə silahı yaratmaq üzrə işini etiraf etmək üçün çox sayda imkanı olub. Bunun əvəzinə onlar MAQATE-yə hər dəfə yalan danışıblar. Onlar həmçinin Birgə Hərtərəfli Fəaliyyət Planı (BHFP) haqqında danışıqlar aparan altı dövlətə öz proqramları haqqında yalan danışıblar. Bu, o deməkdir ki, bu sövdələşmə xoş məram və ya şəffaflıq əsasında qurulmayıb. O, İranın yalanı üzərində qurulub. İranın nüvə yalanı bu ölkənin nüvə sövdələşməsində yer alan "heç bir halda İranın hər hansı nüvə silahları almağa, hazırlamağa və ya əldə etməyə çalışmayacağı" haqqında vədi ilə bir araya sığmır".

Pompeo qeyd edir ki, mayın 12-si - ABŞ prezidentinin BHFP-nin düzəldilməsi üçün müəyyən etdiyi müddət yaxınlaşdıqda o, yaranmış vəziyyətlə bağlı Avropalı müttəfiqləri və digər ölkələrlə məsləhətləşəcək.

İİR XİN rəhbərinin müavini Abbas Arakçı Netanyahunun İranın ünvanına iddialarını köhnə adlandıraraq, əvvəllər İsraillilərin bu cür ittihamlar əsasında İranın nüvə proqramının mümkün hərbi aspektləri məsələsini qaldırırdılar, amma MAQATE 2015-ci ildə bu sənədlərin səhihliyini təkzib edib.

İran XİN başçısı Məhəmməd Cavad Zərif bildirib ki, İsrailin Tehranın məxfi hərbi nüvə proqramı olması haqqında ittihamları keçmişdə Atom Enerjisi üzrə Beynəlxalq Agentlik (MAQATE) tərəfindən tədqiq edilmiş "köhnə ittihamlardır". -0-