Türkiyənin iqtidar partiyası, ədliyyə naziri və “kasetin var…”

İqtidara kəskin müxalif mövqedə olan bir siyasətçinin həyat yoldaşına qarşı “cinsiyyətçi” tvitlər atan bir nəfər yaxalandı. AKP-nin media işlərini yönləndirən Şamil Təyyar başda olmaqla, iqtidar partiyasına  yaxın olan xeyli jurnalist-yazar  o  tvitlərə qarşı daha sərt mövqe nümayiş etdirdilər. Həyata keçirməyə çalışdığı məhkəmə  islahatlarını  təqdir etdiyim ədliyyə naziri Əbdülhəmid Gülün tviti isə örnək bir dövlət adamı davranışı oldu: “Başak Dəmirtaşla bağlı iyrənc paylaşımı qınayır, bu əxlaqsız və təhqiredici işi ən ağır şəkildə lənətləyirəm. Bir insanın şərəfi, iffəti və heysiyyatı hər şeyin üzərindədir. Bu tərbiyəsiz və araqarışdıran sözlərə qarşı hüquq lazımi addımı atacaq”.

Başak Dəmirtaş kürd təmayüllü siyasəti təşkilatlandıraraq məclisin üçüncü partiyası halına gətirən Səlahəddin Dəmirtaşın xanımıdır. Onun liderliyində ilk dəfə seçkidə müstəqil partiya şəklində iştirak edən kürd siyasi hərəkatı  13 ildən sonra AKP-nin təkbaşına iqtidar ola bilməsini əngəlləmiş, 12 iyun 2015-ci ildə keçirilən seçkidə AKP təkbaşına iqtidar üçün lazım olan 276 səsi qazana bilməmişdi (258 səsdə qalmışdı).

Dövlət başçısı Ərdoğan yeni hökuməti qurma vəzifəsini AKP sədri və baş nazir Əhməd Davudoğluna versə də Davudoğlunun adamları arabir ana müxalifətdəki CHP ilə  45 günlük müddəti başa çatdırmaq üçün formal müzakirələr apardı, Konstitusiyaya və qanuna görə hökuməti qurmaq üçün vəzifə verilmə növbəsinin Kamal Kılıçdaroğlunda olmasına baxmayaraq, dövlət başçısı bu vəzifəni ona verməyərək ölkəni 5 ayda ikinci seçkiyə aparmağı uyğun gördü.

1 noyabr 2015-ci ildə AKP yenidən güclənərək təkbaşına iqtidarını davam etdirdi, Dəmirtaşın başında durduğu partiyanın reytinqi nisbətən aşağı düşsə də parlamentin üçüncü partiyası kimi yerini qorudu. O vaxtdan sonra təxminən 11 ay Ərdoğan və Dəmirtaş bir-birinə ən kəskin və barışmaz siyasi rəqiblər oldular. 2014-cü ilin oktyabrında Suriyanın şimalında cərəyan edən hadisələrə etiraz etmək üçün İstanbulda xalqı küçəyə çağıran Dəmirtaş 2016-cı ilin oktyabrında həbs edilərək Bolqarıstan sərhəddindəki Ədirnə şəhərinin həbsxanasına göndərildi.

Dəmirtaşın məhkəmə prosesləri AİHM-in də, dünyanın da diqqət mərkəzindədir, onun azad edilməsi üçün dəfələrlə tələblər gəlsə də məhkəmə azad etməyib. İqtidardakılar xaricdən gələn reaksiya və təzyiqlərə məhəl qoymadan Dəmirtaşı həbsdə saxlamağa davam ediblər. Bu qədər təfərrüatı niyə yazdım? Başında durduğu partiyanın apardığı siyasətə görə bəzi vaxtlarda separatçı, bəzi vaxtlarda terror dəstəkçisi, bəzi vaxtlarda Troya atı və s. suçlamalara məruz qalan bir siyasət adamının xanımına qarşı sosial mediadakı “cinsiyyətçi” hücum Türkiyənin iqtidarı gözüyumulu şəkildə dəstəkləyən jurnalistlərini ayağa qaldırır, iqtidar partiyasının təbliğatına cavabdeh şəxs buna elə şəkildə qarşı çıxır ki, başqa vaxt min cür epitetlə suçlanan o müxalif liderin partiyasının cavab verməsinə belə ehtiyac qalmır.

Ədliyyə nazirinin sərt reaksiyası isə sadəcə alqış toplayır. Çünki istənilən ölkəni ayaq üstündə saxlayan kateqorial dəyərlərin başında mənəvi dəyərlərin gəldiyini anlamaq üçün hamımız kimi onlara da Allahın verdiyi bir cüt göz, bir beyin kifayət edir.Vətəndaşları idarə edən dövlət, iqtisadiyyatından, hərbi sənayesindən, xarici siyasətindən əvvəl, bax, bu mənəvi dəyərlərə göstərilən sayğı ilə güclü olur.

Bəs Başak Dəmirtaşa qarşı sosial media üzərindən edilən  “cinsiyyətçi” hücuma Türkiyə ədliyyə nazirinin, iqtidar partiyasının təbliğat rəhbərinin və iqtidar partiyasını sinələrini sipər edərək qeydsiz-şərtsiz müdafiə edən jurnalistlərin göstərdikləri sərt reaksiya vətəndaşı olduğumuz ölkədəki hansı hadisələri yadımıza salır? Təəssüf ki, iqtidarı xaricdən tənqid edən bir jurnalist qadına qarşı içəridəki bir TV-nin başında duran şəxsin “əlimdə kasetin var, susmasan, yayımlayacağam” şəklindəki utancverici təhdidini. Özünü iqtidarın “informasiya siyasətinin tərkib hissəsi” kimi görən heç bir qadın jurnalistin o təhdidə qarşı ağzını açmamasını xatırladır…

Vətəndaşı olduğum ölkənin insanlarının əksəriyyətinin isə öz mənəvi dəyərlərinə sahib çıxmasını sosial mediadan izləyib qürur duyuruq.

Dövlət olacağıqsa, məhz o mənəvi dəyərləri o həmrəyliklə müdafiə edərək ola biləcəyik.

Mayis Əlizadə