1,43 mln ha kənd təsərrüfatı torpaqlarına görə subsidiyalar bölüşdürülüb

İyulun 24-də kənd təsərrüfatı naziri İsmət Abasovun sədrliyi ilə keçirilən Kənd Təsərrüfatı Subsidiyalarına dair Respublika Komissiyasının növbəti iclasında kənd təsərrüfatı istehsalçıları və imtiyazlı qiymətlərlə mineral gübrələr satan şirkətlərə subsidiyaların verilməsi ilə bağlı qərar qəbul olunub. 

Kənd Təsərrüfatı Nazirliyinin mətbuat xidmətinin məlumatına görə, torpaqların becərilməsi və çoxillik bitkilərə qulluğa görə 393 663 kənd təsərrüfatı istehsalçısı subsidiya alacaq. Yanacaq və motor yağlarının alınması xərclərinə görə onlar ümumilikdə 57,4 mln manat kompensasiya alacaq. Hər bir hektara subsidiya 40 manat təşkil edir. Pullar kənd təsərrüfatı istehsalçılarının “Kapital Bank” ASC-nin buraxdığı xüsusi plastik kartlarına köçürüləcək. 

Bundan əlavə, komissiyanın iclasında beş subyektə ümumi həcmi 2,6 mln manat olan subsidiyaların ayrılması ilə bağlı bu il sayca beşinci qərar qəbul olunub. Vəsaitləri “Aqrolizinq” dövlət ASC, həmçinin “Aqrokimya” MMC, “Pərviz İKF”, “Mikro Az Feed” və “İ.E.R. Ltd” alıb. Bu şirkətlər 54 234 ha torpağın gübrələnməsi üçün 9 862 fermer və kənd təsərrüfatı müəssisələrinə 10 379 ton mineral gübrə satıb.

Azərbaycan kənd təsrrüfatının subsidiyalaşdırılması 2006-cı ildən həyata keçirilir. 2007-ci ildən fermerlərə mineral gübrələrin satılması ilə bağlı vəsaitlərin 50%-i dövlət büdcəsindən subsidiyalaşdırılır. Taxıl və düyü istehsalçıları hər hektar torpağa görə əlavə 40 manat alır.

2013-cü ildə kənd təsərrüfatı subsidiyalarının verilməsi üçün dövlət büdcəsindən 125 mln manat, o cümlədən mineral gübrələr üçün 25 mln manatın ayrılması nəzərdə tutulub. Bu günki günə mineral gübrələrin satılan həcmlərinə görə təxminən 14,6 mln manat sərf olunub. 

2012-ci ildə bu məqsədlər üçün 114 mln manat xərclənib. Onlardan 18 mln manatı mineral gübrə təchizatçılarına ayrılıb. 08D