2050-ci ilədək Azərbaycanda ərzaq tələbatı 70% artacaq

2050-cı ilə qədər adambaşına düşən gündəlik kilokalori 2800-dən 3050-dək artacaq. Bu o deməkdir ki, Azərbaycanda 2050-ci ilədək ərzaq tələbatı 70% artacaq. Bu barədə İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı bildirib.

Azərbaycanda Amerika Ticarət Palatası (“AmCham”), İqtisadi İslahatların Təhlili və Kommunikasiya Mərkəzi, Azərbaycan prezidentinin iqtisadi islahatlar üzrə köməkçisinin xidməti, ADA Universitetinin birgə təşkilatçılığı və “KPMG Azerbaijan” şirkətinin dəstəyilə "Milli iqtisadiyyat və iqtisadiyyatın əsas sektorları üzrə strateji yol xəritəsinin başlıca istiqamətləri"nin ictimai müzakirəsi çərçivəsində “Kənd təsərrüfatına strateji baxış: Rəqabətlilik, ərzaq təhlükəsizliyi və sosial aspektlər” mövzusuna həsr olunmuş konfrans keçirilib.

Konfransda iqtisadiyyatın strateji yol xəritəsi çərçivəsində kənd təsərrüfatına strateji baxışlar, o cümlədən rəqabətlilik, ərzaq təhlükəsizliyi, sosial aspektlər (məşğulluq, regionların inkişafı və s.)  müzakirə olub.

Azərbaycan prezidentinin iqtisadi islahatlar üzrə köməkçisinin xidmətinin kənd təsərrüfatı və sənaye məsələləri departamentinin aqrar məsələlər bölməsinin rəhbəri Elxan Mikayılov qeyd edib ki, 2050-ci ilədək Azərbaycanda əhalinin sayının 12,1 mln. nəfərə çatması gözlənilir ki, bu da gələcəkdə ölkənin ərzaq tələbatını artıracaq. 08D