«Aqrolizinq» ASC minimum ziyana düşüb

Dövlət “Aqrolizinq” ASC yenidən ili ziyanla başa vurub. Bu dəfə şirkətin ziyanı 639,7 min manat olub.

2015-ci ildə  “Aqrolizinq” ASC-nin əməliyyat gəlirləri 2014-cü illə müqayisədə 12,5% azalaraq 113,1 mln manat olub. Xərclər nəzərə alınmaqla əməliyyat mənfəəti 10,8 mln manatı keçib. Bu, əvvəlki ildəkindən 3,6 mln manat çoxdur. Amma inzibati xərclər 2,4 mln manat artdığı üçün “Aqrolizinq” ziyana düşüb.

2016-cı ilin əvvəli üçün “Aqrolizinq” ASC-nin aktivləri 16,8% artaraq 615,2 mln manat olub. Bunun 342 mln manatı kənd təsərrüfatı texnikası, gübrə, ev heyvanlarının lizinqə satışı üzrə uzunmüddətli borclardır.

2015-ci ildə “Aqrolizinq” ASC-nin nizamnamə kapitalı 40 mln manat artırılaraq 234,5 mln manata çatıb.

Şirkət dövlət maliyyələşməsi əsasında kənd təsərrüfatı texnikası, avadanlıqları,  gübrə, ev heyvanlarını lizinqə verir, fermerlərin kənd təsərrüfatı bitkiləri əkini və məhsul yığımı sifarişlərini yerinə yetirir. 

Qeyd edək ki, 2005-ci ildən 2014-cü ilə kimi “Aqrolizinq” ASC ilk dəfə 829,5 min manat xalis mənfəət əldə edib.

2016-cı il yanvarın 1-i üçün “Aqrolizinq” ASC-nin ümumi ziyanı 11,1 mln manat təşkil edib. 08D