ARDNŞ rəhbəri ölkənin qazlaşdırılması barədə qeyri-dəqiq məlumatlar verib

Əgər 2004-cü ildə ölkədə qazlaşdırılma səviyyəsi 39,8% idisə, 2013-cü ilin yekununda 89,8%-ə çatıb. Bunu fevralın 5-də regionların sosial-iqtisadi inkişafı proqramlarının icrasına həsr edilmiş konfransda ARDNŞ rəhbəri Rövnəq Abdullayev bildirib. 

Onun sözlərinə görə, ölkə üzrə real qazla əhali abunəçilərinin sayı 2004-cü ildə 700 mindən aşağı olduğu halda, bu gün 1 milyon 600 mindən artıqdır. 

"Bunun üçün ümumi uzunluğu 4 min 800 kilometrdən artıq magistral qaz kəmərləri, 25 min kilometrdən çox müxtəlif diametrli daşıyıcı xətt çəkilib, 8 min kilometrə yaxın boru xətti isə əsaslı təmir olunub", - deyə Abdullayev qeyd edib. 

Qazlaşdırılma layihələri çərçivəsində 18 yeni qazpaylayıcı stansiya inşa olunub, 41 qazpaylayıcı stansiya yenidən qurulub. 

ARDNŞ prezidentinin sözlərinə görə, lokada şəraitində yaşayan Naxçıvan Muxtar Respublikasının tam qazlaşdırılması başa çatdırılıb. Əhali abonentlərinin sayğaclaşdırılmasının 5 faizdən 100 faizə çatdırılması, o cümlədən 50 faiz smart-kart tipli elektron qaz sayğacı ilə təchiz olunması nəticəsində itkilərin həcminin 25 faizdən 7,4 faizə endirilməsinə nail olunub. 

Abdullayevin sözlərinə görə, 2013-cü ildə qazpaylayıcə sistemə 13,3 mlrd m3 qaz tədarük edilib. 

ARDNŞ rəhbəri dəqiq danışmayıb. Statistikaya görə 2004-cü ildə ölkədə 1,1 mln abunəçi olub. Onların 780 mini qaz alıb. Qalan abunəçilərə qaz tədarükü məhdudiyyəti olub. Vəziyyət yaxşılaşsa da, idealdan uzaqdır. Praktik olaraq hər yerdə «Qazla təchizat haqqında» qanun pozulur.     —12D--