Avropaya İnteqrasiyası üzrə Dövlət Komissiyasının 4-cü iclası keçirilib

Avqustun 24-də Avropaya İnteqrasiyası üzrə Dövlət Komissiyasının 4-cü iclasında Avropa İttifaqı ilə əlaqələrin mövcud vəziyyəti və əməkdaşlıq perspektivləri müzakirə olunub. 

İqtisadi İnkişaf Nazirliyindən Turana verilən məlumata görə, müzakirələrin nəticələrinə əsasən, komissiyanın işinin təkmilləşdirilməsi və qanunvericiliyin Aİ qanunvericiliyinə uyğunlaşdırılmasına dair tədbirlər planı ilə bağlı qərar qəbul edilib. 

Avropaya İnteqrasiyası üzrə Dövlət Komissiyasının sədri, iqtisadi inkişaf naziri Şahin Mustafayev bildirib ki, Azərbaycanın xarici siyasətinin əsas istiqamətlərindən biri də Avropa İttifaqı ilə davamlı və səmərəli münasibətlərin qurulması və inkişaf etdirilməsidir. Bu münasibətlərin əsası 1996-cı ildə imzalanmış Tərəfdaşlıq və Əməkdaşlıq Sazişi və Azərbaycanın Avropa Qonşuluq Siyasətinə qoşulması ilə qoyulmuşdur. 2006-cı ildə bu Avropa Qonşuluq Siyasəti çərçivəsində Fəaliyyət Planı qəbul edilib.

Hazırda Assosiasiya Sazişi layihələri, Vahid Hava Məkanına dair Razılaşma və Modernləşməyə dair Strateji Tərəfdaşlıq Sənədinə dair danışıqlar gedir. 

İclasda həmçinin xarici işlər nazirinin müavini Mahmud Məmmədquliyev, Prezident administrasiyası rəhbərinin müavini Novruz Məmmədov çıxış ediblər. 

Qeyd olunub ki, 2013-cü ilin birinci yarısında Avropa İttifaqı ilə ticarət dövriyyəsinin həcmi ümumi ticarətdəki payının 43% təşkil edib. Son 10 ildə Son 10 ildə Avropa İttifaqı ölkələrinin Azərbaycanda əsas kapitala yönəlmiş və qeyri-neft sektoruna qoyulmuş birbaşa investisiyalarının ümumi xarici investisiyalarda xüsusi çəkisi müvafiq olaraq 51% və 36,5% olub. Avropa İttifaqının 20 üzv ölkəsi ilə Azərbaycan arasında ikiqat vergitutmanın aradan qaldırılması, 17 ölkəsi ilə sərmayələrin təşviqi və qarşılıqlı qorunması haqqında sazişlər imzalanmış, 13 üzv ölkə ilə Hökumətlərarası İqtisadi Komissiya yaradılıb. 08D