Azərbaycanda səhmlərin dövriyyəsi 5,9% azalıb

 Bu ilin beş ayı ərzində Azərbaycan şirkətlərinin səhmləri 73,5 mln. manat təşkil edib. Bu barədə Qiymətli Kağızlar üzrə Dövlət Komitəsindən məlumat verilib. Səhmlər üzrə əməliyyatların həcmi ötən ilin müvafiq dövrü ilə müqayisədə 5,9%  azalıb. 

    Bazar iştirakçılarının məlumatına görə,  əməliyyatların əsas hissəsi birjadankənar təkrar bazarda, həmçinin ilkin yerləşdirmə, o cümlədən səhmlərin daha yüksək nominal dəyəri üzrə konvertasiya əməliyyatları yolu ilə həyata keçirilib.

     Azərbaycan dünyanın azsaylı ölkələrindəndir ki, fond birjasının olmasına baxmayaraq, listinq, birja kotirovkası və birja indeksi kimi mühüm bazar atributları yoxdur. Səhmlər üzrə birja əməliyyatları formal xarakter daşıyır və qiymətli kağızların alqı-satqısı üzrə qiymətlər əsasən nominal dəyər üzrə göstərilir.  

    Ümumilikdə, institusional strukturların və qanunverici bazanın olmasına baxmayaraq, səhmlər və korporativ qiymətli kağızların digər növləri Azərbaycanda kapital bazarının alətinə çevrilməyib. Azərbaycanda səhmlərin yerləşdirilməsi üzrə emitentlər kimi əksər hallarda  maliyyə strukturları çıxış edirlər. Ekspertlər hesab edirlər ki, buna səbəb özəl sektoru da əhatə etmiş korrupsiyadır. 08B