Azərbaycanda Vergilər Nazirliyinə dəstəklə bağlı Tvinninq Layihəsi yekunlaşıb

Avropa İttifaqının (Aİ) Qonşuluq Siyasəti çərçivəsində “İnsan resurslarının inkişafı sahəsində Azərbaycan Respublikasının Vergilər Nazirliyinə dəstək” Tvinninq Layihəsi başa çatıb.

Turan-ın məlumatına görə, mərasimdə çıxış edən vergilər nazirinin müavini Sahib Ələkbərov bildirib ki, Vergilər Nazirliyi dövlət vergi orqanları qarşısında qoyulan məqsəd və vəzifələrə nail olunması üçün insan resurslarının inkişaf etdirilməsini daim diqqət mərkəzində saxlayır.

O qeyd edib ki, vəzifələrdən biri elektron auditdir, bu, əməkdaşların peşə inkişafını zəruri edir.

Ələkbərov bildirib ki, qarşıya qoyulmuş hədəflərə çatmaq üçün zəruri qanunvericilik, institusional və maddi-texniki baza artıq yaradılıb. 27 ay davam edən Tvinninq Layihəsinin icrası zamanı Vergilər Nazirliyinin aidiyyəti əməkdaşları insan resurslarının idarə edilməsi, risklərin analizi üçün informasiyaların toplanması və təhlili üsulları sahəsində İspaniya və Fransa vergi administrasiyalarının ən yaxşı təcrübəsini ətraflı şəkildə öyrəniblər.  

Avropa İttifaqının nümayəndəliyinin əməkdaşı Jerom Vilyams deyib ki, postsovet məkanında Azərbaycan tvinninq layihələrin sayına görə liderdir.

Onun szölərinə görə, son 10 ildə Avropa İttifaqının vasitəsi ilə ölkədə 47 Tvinninq Layihəsi həyata keçrilib.

«Bu layihələr Avropa təcrübəsinə yaxınlaşmağa imkan yaradır», deyə o bildirib.

Fransa səfirinin I müşaviri F.D.Lozinski deyib ki, layihə üçün əllərindən gələni ediblər.

İspaniyanın Azərbaycanda müvəqqəti işlər vəkili Q.Liano bildirib ki, onlar vergidən yayınma ilə mübarizə, informasiya bazasının yaradılması barədə məlumat veriblər.

«Bütün bunlar təcrübə tələb edir, layihə də bu təcrübənin əldə edilməsi üçündür», deyə o bildirib. 71D