Azərbaycanla əmtəə mübadiləsinin üçdə ikisi 10 ölkə arasında bölünür

Bu ilin dörd ayı ərzində Azərbaycanın dünyanın 132 ölkəsi ilə xarici ticarət əlaqələri olub. Ölkənin xarici ticarət dövriyyəsinin 67% ($7 750 mln) onlardan 10-nun payına düşür. Bu barədə Dövlət Gömrük Komitəsinin hesabatında deyilir. 

Son illər Azərbaycandan neft və neft məhsullarının ixracı coqrafiyasına ciddi şəkildə Hind okeanı hövzəsi, Şərqi və Cənub-Şərq Asiya ölkələri daxil olub. Bu ilin dörd ayı ərzində Azərbaycanın ümumi ticarət dövriyyəsinin 24,4%-i İndoneziya, Tailand, Tayvan və Hindistanın payına düşür, bu da Azərbaycanla ticarət əlaqələri olan Avropa və digər ölkələrin mövqelərini sıxışdırıb.

Hesabat dövründə Azərbaycanın ABŞ ($360 mln) və İsrailə ($293,7 mln) xarici ticarət dövriyyəsi ötən ilin analoji dövrü ilə müqayisədə müvafiq olaraq 46% və 62% azalıb. Türkiyə ilə ticarət dövriyyəsinin həcmi azalaraq (-9%) $616 mln təşkil edib.

Azərbaycanın Britaniya ($410,5 mln, +64%), Almaniya ($939,3 mln, +40%) və Rusiya ilə ($904,3 mln, +38%) xarici ticarət əlaqələri göstəriciləri yaxşılaşıb. İlk yerdə əvvəlki tək İtaliyadır ($1,7 mlrd): Milan birjası Azərbaycan neftinin satış yeri kimi qalmaqdadır. 

İdxal strukturunda ölkələrə görə Rusiya ($477,6 mln), Türkiyə ($432,6 mln), Britaniya ($295,5 mln), Almaniya ($232 mln) və Çin ($225,4 mln) liderdir. 08D