«Azneft» 2017-ci ildə neft və qaz hasilatını artırmağı planlaşdırır

“Azneft” İstehsalat Birliyi (SOCAR-ın hasilat və qaz üzrə törəmə strukturu) 2017-ci ildə neft və qaz hasilatını artırmağı planlaşdırır. Bunun üçün 88 yeni quyu qazılacaq.
Azərbycan Dövlət Neft Şirkətinin mətbuat xidmətinin məlumatına görə, iyunun 23-də “Azneft”-in baş direktoru Daşqın İskəndərovun iştirakı ilə İB-də 2017-ci ilin iş proqramı müzakirə olunub.

“Proqrama əsasən, 2017-ci ildə 88 yeni quyunun qazılması, 89 quyuda qazma işlərinin başa çatdırılması, 45 yeni obyektin istismara verilməsi nəzərdə tutulur”, - deyə məlumatda qeyd edilir.

Bundan başqa, İB-nin baş direktorunun müavini, baş geoloq Ədalət Eminov çıxışında qeyd edib ki, cari ilin sonuna kimi “Qoşadaş” strukturunda kəşfiyyat işləri yekunlaşacaq, müsbət nəticə əldə edilərsə, qazma işlərinə başlanılacaq. Eləcə də gələn il “Bulla-dəniz” yatağında seysmik-kəşfiyyat işlərinin genişləndirilməsi nəzərdə tutulur.

Hazırda “Azneft” İB tərəfindən 18 onşor və 13 dəniz neft-qaz yatağının istismarı həyata keçirilir.

2015-ci ildə “Azneft” 6 mln 778 min ton neft və 6,1 mlrd kubmetr qaz istehsal edib.

2016-cı ildə neft hasilatı 6,3 mln ton, 2017-ci ildə 6,4 mln ton, 2018-ci ildə 6,5 mln ton səviyyəsində proqnozlaşdırılır.

2016-cı ildə qaz hasilatı illik 5,6 mlrd kubmetr, 2017-2018-ci illərdə 5,8 mlrd kubmetr səviyyəsində proqnozlaşdırılır. –12D--