Bakı NEZ-in tam modernləşməsi 2020-ci ildə başa çatacaq - Honeywell UOP

SOCAR-ın Heydər Əliyev adına neft emalı zavodunun (NEZ) yenidənqurma və modernləşdirilməsi 2020-ci ildə başa çatacaq, deyə PRNewswire portalı məlumat verir.

Neft emalı zavodunda ciddi emissiya standartlarına cavab verən yüksək keyfiyyətli benzin istehsalı üçün “Honeywell UOP” texnologiyasından istifadə ediləcək. Söhbət avro-5 standartlı benzin istehsalına imkan verən texnologiyadan gedir.

Honeywell UOP-un baş meneceri Pit Piotrovskinin sözlərinə görə, şirkət kompleksə yeni texnologiya gətirəcək, SOCAR daha az ziyanlı maddə olan benzin istehsal edəcək.

"Saziş NEZ-in modernləşməsinin iqtisadi və texnoloji qiymətləndirilməsini nəzərdə tutur. NEZ-in yenidən qurulması layihələri üzrə Texniki İqtisadi Əsaslandırılma UOP şirkətinin iştirakı ilə həyata keçirilib. UOP şirkəti SOCAR-ın Türkiyədə həyata keçirdiyi STAR layihəsində də müxtəlif qurğular üzrə lisenziar seçilib", - deyə Piotrovski bildirib.

2015-ci ilin noyabrında UOP NEZ-in strukturuna daxil olan qurğular, o cümlədən, koks naftasının hidrotəmizləməsi, katalitik-krekinq, izomerləşmə, MTBE, doymamış maye qazın merkaptan oksidləşdirilməsi, aminlə təmizləmə və sulfidin oksidləşməsi qurğuları üzrə müvafiq lisenziar seçilib.

* Yenidənqurmadan sonra NEZ-in gücü ildə 7,5 mln ton neft olacaq.

2017-ci ildə NEZ-də yeni bitum qurğusu, 2019-cu ilin II rübündə avro-5 dizel yanacağı, bir il sonra avro-5 benzini istehsal ediləcək. –12В--