Çindən 6 min qutu ipəkqurdu toxumu gətirilib

Bakı/24.04.18/Turan: Bu gün, aprelin 24-də Çindən Azərbaycana 6 min qutu ipəkqurdu toxumu (qrena) gətirilib. Toxumlar inkubasiyaya qoyulması üçün Qax Damazlıq İpəkçilik Stansiyasına yola salınıb.

Kənd Təsərrüfatı Nazirliyinin məlumatına görə, inkubasiya müddəti başa çatdıqdan sonra əldə olunacaq ipək qurdları dağlıq ərazidə yerləşən rayonların kümçülərinə əvəzi ödənilmədən paylanılacaq.

Nazirlik bildirir ki, tender müqaviləsi əsasında Çindən 2 mərhələdə 13 min qutu yüksək keyfiyyətli hibrid ipəkqurdu sənaye toxumu alınıb. Bu toxumun aran, dağlıq və dağətəyi rayonların kümçülərinə paylanılması nəzərdə tutulur.

Aprelin 17-də toxumların ilk partiyasının ölkəyə gətirildiyi bildirilir.

Nazirlik qeyd edir ki, son iki ildə Çindən ölkəyə 2,5 mln. ədəd tut tingi də gətirilib, bölgü əsasında əvəzi ödənilmədən baramaçılıq rayonlarına paylanılıb və bu rayonların ərazilərində yeni intensiv tipli tut (çəkil) bağlarının salınması təmin edilib.

Hökumət, hələ 2016-cı ildən ipəkçiliyə diqqətin artırılmasını prioritet elan edib. Prezident həmin il noyabrın 16-da ipəkçiliyin və fındıqçılığın inkişafına dövlət dəstəyinin gücləndirilməsi ilə bağlı əlavə tədbirlər haqqında sərəncam imzalamışdı.

Həmin sərəncamda barama toxumlarına 163 min, tut tinglərinə 600 min, fındıq pöhrələrinin alınmasına isə 700 min manat ödənilməsi nəzərdə tutulurdu.

Ölkə başçısı 2017-ci il oktyabrın 6-da "İpəkçiliyin inkişafına dövlət dəstəyinin davam etdirilməsi ilə bağlı tədbirlər haqqında" sərəncam da imzalayıb. Həmin sərəncama görə, Kənd Təsərrüfatı Nazirliyi tut tinglərinin, barama toxumlarının tədarük edilməsi və məhsul istehsalçılarına əvəzsiz verilməsinə 1,05 milyon (bir milyon əlli min) manat sərf edəcək.

Həmin vəsaitin 775 min manatı tut tinglərinin, 275 min manat isə barama toxumlarının alınmasına yönəldilməli idi.

Bundan əlavə, prezident İlham Əliyev 2017-ci il noyabrın 27-si 2018-2025-ci illərdə Azərbaycanda baramaçılığın və ipəkçiliyin inkişafı ilə bağlı dövlət proqramını təsdiq edib.--0--