Daşınmaz əmlak üzərində hüquqların qeydiyyatı 38% artıb

Bu ilin on ayı ərzində Əmlak Məsələləri Dövlət Xidmətinin (ƏMDX) daşınmaz əmlak obyektlərinin reyestrinin aparılması strukturları tərəfindən 406,2 min daşınmaz əmlak obyekti üzərində mülkiyyət hüquqları qeydə alınıb ki, bu da ötən ilin müvafiq dövrü ilə müqayisədə 38,1 faiz çoxdur. Bu barədəqurum özü məlumat yayıb.

Bu ilin yanvar-oktyabr ayları ərzində ilk dəfə olaraq 63,5 min daşınmaz əmlaka hüquqlar verilib. Bu, 2022-ci ilin eyni dövrü ilə müqayisədə 10% azdır.

Mülkiyyət hüquqlarının qeydiyyatı üzrə əməliyyatların 84%-i (342,6 min dövlət reyestrindən çıxarış) təkrar bazarın payına düşür. Təkrar bazarın aktivliyi ötən ilin müvafiq dövrü ilə müqayisədə 1,5 dəfə artıb.

Bu ilin on ayında qeydə alınan daşınmaz əmlak hüquqlarının strukturunda kənd təsərrüfatı, sahibkarlıq və digər məqsədlər üçün torpaq sahələrinin xüsusi çəkisi (272 min əməliyyat) 67 faiz təşkil edir. Eyni zamanda, bu tip daşınmaz əmlak üzrə əməliyyatlar ötən ilin müvafiq dövrü ilə müqayisədə 72% artıb.

2023-cü ilin yanvarından 31 oktyabra qədər aşağıdakı daşınmaz əmlak obyektləri üzərində hüquqlar qeydə alınıb: şəhərdaxili və kənd yerlərində fərdi yaşayış evləri - 45 141 (2022-ci ilin eyni dövründə - 41 040), çoxmənzilli binalardakı mənzillər - 79 589 (75 387) ), qeyri-yaşayış binaları - 2 660 (2 927), qeyri-yaşayış sahələri - 6 163 (6 100), əmlak kompleksləri - 601 (660) və çoxmərtəbəli yaşayış binaları - 87 (44).

Bakı şəhərində yerləşən daşınmaz əmlak bazarında əməliyyatların payı (83,9 min) 20,6% təşkil edib.