DB Bakı-Muğanlı yolunun genişləndirilməsi üçün 140 mln. kredit ayırır

Dünya Bankı (DB) Azərbaycana Bakı-Şamaxı-Muğanlı avtomobil yolunun genişləndirilməsi üçün əlavə olaraq 140 mln. dollar ayrılması mümkünlüyünə baxır. Bu barədə Turan-a DB-nin Bakı nümayəndəliyindən bildiriblər.

DB bir neçə il əvvəl Bakı-Şamaxı-Muğanlı yolunun ilk dəfə maliyyələşdirilməsində də iştirak edib. İndi elə həmin yolun iki zolaqdan dörd zolağa qədər genişləndirilməsi nəzərdə tutulur.

Kreditin DB-də 2016-cı il iyunun 30-da başa çatan maliyyə ilinin sonuna qədər ayrılacağı ehtimal olunur.

Bu ilin sonuna qədər tərəflər arasında başqa layihələrə baxılmayacaq. Eyni zamanda, DB və Azərbaycan arasında iqtisadi islahatlara dəstək haqqında daimi məsləhətləşmələr davam edir.

2010-cu ildən etibarən DB ümumi dəyəri 356,15 mln. dollar olan magistral yolların yenidənqurması layihəsini maliyyələşdirir. Bu layihə iki istiqamətdən ibarətdir: ölkənin magistral yollarının və nəqliyyat dəhlizlərinin yenidənqurması və yerli yolların yenidənqurması.

Bakı-Şamaxı-Muğanlı avtomobil yolunun yenidənqurması ilə yanaşı, DB Ələt-Salyan yolunun bir hissəsinin və Bakı-Astara avtomobil yolunun maliyyələşdirilməsində iştirak edib.

Azərbaycan 1992-ci ildən DB-nin üzvüdür. 2016-cı il fevralın 1-nə olan məlumata görə, DB Azərbaycana 60-dan çox layihənin həyata keçirilməsi üçün ümumilikdə 3 mlrd. 785,82 mln. dollar ayırıb.

Bundan başqa, 1995-2014-cü illərdə DB Azərbaycana ümumi məbləği 41,586 milyon dollar olan 45 qrant ayırıb. -06B-