Dördüncü ənənəvi beynəlxalq sığorta forumunun proqramı açıqlanıb

Dördüncü ənənəvi beynəlxalq sığorta forumunun proqramı açıqlanıb. Forum iyunun 20-21-də Bakıda keçiriləcək.

Azərbaycan Sığortaçılar Assosiasiyasının (ASA) saytı bildirir ki,  Maliyyə Nazirliyinin birgə təşkilatçılığı ilə keçirilən tədbirin nəticələri ilə bağlı gələcək fəaliyyət bazası və yerli sığorta bazarının fəaliyyət prioritetləri müəyyən ediləcək.

Çıxışların ilk blokunda Qafqaz regionunda sığorta bazarında perspektivlərə və yeni biznes xəttinə baxılacaq. Müzakirələr nəticəsində bu sahədə ən münasib siyasət və regional əməkdaşlıq strategiyası müəyyən ediləcək, artım mənbələrinə, regionda iqtisadi vəziyyətə əsaslanaraq daha perspektiv istiqamətlərə, investisiya imkanlarına baxılacaq.  

Azərbaycan üçün dövlət tənzimlənməsi və bazar reallığı arasında balans yaradan kənd təsərrüfatı sığortasının inkişafı çox aktualdır. Beynəlxalq bazarların icmalına (MDB, Avropa, Asiya) əsasən kənd təsərrüfatı bitkilərinin və ev heyvanlarının icbari sığortasının qanunverici imkanları, bu sahədə sığortaçılarla dövlət hakimiyyəti arasında əməkdaşlığın gücləndirilməsi məsələlərinə baxılacaq. Bu seqmentin dövlət tənzimlənməsi  (lisenziyalaşdırma, sertifikatlaşdırma, proqramların idarə olunması, inkişaf üçün subsidiyalar) də diqqət mərkəzində olacaq.

ASA hesab edir ki, kənd əhalisi müntəzəm olaraq sığortanın bu növü barədə məlumatlandırılmalı, sığortaçılar geniş aktuar prinsiplər qəbul etməli, zərərlərin idarə olunmasında informasiya texnologiyalarından istifadə etməlidir.   

Müzakirələrin ikinci günü tibbi sığortadan başlayacaq. 

Xatırladaq ki, Azərbaycanda şirkətlər bu biznesi mənfəətli etməyə çalışırlar, halbuki bütün dünyada bu sahə sosial sahədir və tədiyələrlə ödənişlər arasında  fərq kiçikdir.

Həmçinin gündəlikdə köhnə problemlərin yeni həlli, bazarın müasir inkişaf tendensiyaları daxil olacaq. Bundan əlavə, icbari tibbi sığortanın tətbiqi, bazar reallığına baxılması, yerli şəraitdə bu növün perspektivləri daxil ediləcək.

Tədbir iştirakçıları tibbi sığortanın daha münasib beynəlxalq inkişaf modelini müəyyən etməyə çalışacaqlar, səhiyyə sistemində islahatların tənzimlənməsi və aparılmasını, həmçinin özəl tibbi sığortanın hesabına səhiyyənin alternativ maliyyələşdirilməsi mənbələrini müzakirə edəcəklər. 

Azərbaycanda populyar olan avtomobillərin korporativ sığortası da diqqətdən kənarda qalmayacaq. OSAQO da (avtomobil sahiblərinin üçüncü şəxs qarşısında mülki məsuliyyəti) daxil olmaqla bu seqmentin inkişafının bazar iştirakçılarının gözləntilərinə cavab verib-vermədiyi müəyyən ediləcək.

Ötən illərin praktikası göstərib ki, forum nümayəndələr arasında interaktiv müzakirələr  üçün səmərəli platformadır. Onun nəticələri isə sığorta sahəsində milli bazarlar arasında əməkdaşlığın möhkəmləndirilməsinə yönələcək.

Forumda iştirak yerli sığortaçıların menecerleri, həmçinin Qafqaz regionu ölkələri, Türkiyə, Gürcüstan, Rusiya, MDB ölkələri və bəzi Avropa dövlətlərinin sığorta, təkrar sığorta və broker şirkətləri tərəfindən təsdiqlənib.   --17D—