Dövlət strukturlarının mülkiyyətçilərin hüququna müdaxiləsi artıb

İnsan Hüquqları üzrə Maarifləndirmə İctimai Birliyi bu gün bəyanat verərək 2011-2012 ci illərdə ölkədə dövlət qurumlarının sahibkarların və vətəndaşların sahibkarlıq fəaliyyətinə və mülkiyyət hüquqlarına müdaxilələrinin artmaqda davam etdiyini bildirib. 

2011-ci ildə 642, 2012-ci ilin I yarısında 504 nəfər kiçik və orta sahibkarlar təşkilata hüquqi yardım alınması üçün müraciət edib. Onlar dövlət qurumlarının (Vergilər Nazirliyi, yerli icra hakimiyyətləri, Dövlət Sosial Müdafiə Fondu və s) sahibkarlıq subyektlərinin işinə müdaxiləsindən narazıdır. “Bakı Quşçuluq” ASC və “Bakı Universal Maşınqayırma” ASC-nin ləğvetmə prosesində səmdarların  hüquqlarının kollektiv şəkildə pozulması halları baş verib. Bəyanatda deyilir ki, biznesin qeyri-qanuni müsadirəsi, qüvvəyə minən məhkəmə qərarlarının icra edilməməsi, gömrükdə rüşvət halları çoxalıb. Regionlardakı sahibkarlar çətin şəraitdədir. Regionlarda icra strukturularının sahibkarlıq fəaliyyətinə müdaxiləsindən müdafiə vasitələri məhduddur. Bunu regionlardan şikayətlərin kütləviliyi də göstərir. Sahibkarlığın inkişafı və regionların sosial-iqtisadi inkişafı üzrə dövlət proqramlarının olmasına baxmayaraq, dövlət strukturları kiçik və orta sahibkarlığın inkişafında ən böyük maneədir, deyə ictimai birliyin bəyanatında bildirilir. 08D