Dövlət torpağın sotunu 10 manata satır

Əmlak Məsələləri Dövlət Komitəsi bir SC-nin torpaq sahəsinin satışı üzrə hərrac elan edib. Şamaxının Sabir qəsəbəsindəki torpağın 1 sotunun start qiyməti 10 manatdır. 

«Şamaxı Şərab-1» ASC-nin 13,6 ha torpağının satışı üzrə hərrac 17 sentyabra təyin edilib. Start qiyməti 13 643 manatdır. Əvvəlki hərraclarda satış qiyməti start qiymətinə müvafiq olub, yəni rəqabət olmayıb. 

Konkret halda SC-nin ltında olan torpaqdan imtinasının səbəbi məlum deyil. Amma əvvəlki illərin praktikası göstərir ki, torpağın özəlləşdirilməsindən imtina formal xarakter daşıyır və bir məqsəd güdür – minoritar səhmdarların torpağa mümkün iddiasının qarşısını almaq. Majoritarlar bildirir ki, torpağın real qiyməti hökumətin müəyyən etdiyi normativ qiymətdən çox baha olur və bazar qiymətinin 30-50%-ə çatır. Təkcə bu il hərrac yolu ilə “Zərif Mahud”, “Bakı Qeyri-Parça Məmulatları”, “Bakı Dəmir Beton-8” və s. SC-lərin torpağı satılıb. 

Azərbaycanda “böyük” özəlləşmə 2005-ci ilin parlament seçkilərindən sonra tormozlanıb. O vaxt dövlət əmlakını qanunsuz yolla özəlləşdirməyə görə iqtisadi inkişaf və səhiyyə nazirləri cinayət məsuliyyətinə cəlb edilib. O vaxtdan torpaq satışına üstünlük verilir və bu, bir çox hallarda korrupsiya xarakteri daşıyır. Ölkənin iqtisad məhkəmələrində bu dövrdə SC və başqa sahibkarlıq subyektlərinin altındakı torpağı özəlləşdirməsinə rədd cavabı verən ƏMDK-nin qanunsuz hərəkətləri ilə bağlı onlarla işə baxılıb. 08B