DSK-da ticarətin statistikasının təşkili müzakirə edilib

Bu gün Dövlət Statistika Komitəsində ticarətin statistikasının təşkilinə həsr edilmiş seminar keçirilib. Dövlət strukturlarının nümayəndələri, həmçinin ekspertlər qeyd ediblər ki, bu sahədə statistik hesabatların təkmilləşməsinə, Gömrük Komitəsi, Mərkəzi Bank və Dövlət Statistika Komitəsinin fəaliyyətinin əlaqələndirilməsinə ehtiyac var. 

DSK ticarət şöbəsinin müdir müavini Aidə İbrahimova qeyd edib ki, beynəlxalq strukturların tövsiyəsinə əsasən, bu ildən Azərbaycanda pul ifadəsində idxal-ixrac əməliyyatlarının faktik göstəriciləri ilə paralel sabit qiymət prinsipi ilə xarici ticari fəaliyyətin ölçülməsi metodikasından istifadə edilir. Bu imkan verir ki, qiymət dəyişməsindən asılı olaraq xarici ticari fəaliyyətin dinamikası kəmiyyətcə müəyyən edilsin. 

Seminar iştirakçıları bildiriblər ki, idxal-ixrac əməliyyatlarının hesablanmasının yeni metodikasının tətbiqi istifadəçiləri çaşdırır. 

Məsələ burasındadır ki, məsələn, DGK-nın məlumatına əsasən, 2012-ci ilin I yarısında pul ifadəsində idxal-ixrac əməliyyatlarının həcmi $17,1 mlrd olub. Bu, ötən ilin eyni dövründəkindən 1,4% azdır. DSK isə xarici ticari fəaliyyətin sabit qiymətlərlə 7,7% azalmasını qeydə alıb. 

Bundan başqa, seminarda qeyd edilib ki, AMB-nin xarici ticari əməliyyatların həcminin ölçülməsinə öz yanaşması var. 

İqtisadi İnkişaf Nazirliyinin təmsilçisi Avropa İttifaqı ölkələri ilə xarici ticari əməliyyatların DSK tərəfindən hesablanmasından məmnunluq ifadə edib. Təklif edilib ki, başqa beynəlxalq iqtisadi cəmiyyətlərlə, o cümlədən İslam Əməkdaşlıq Təşkilatı ilə ticarətin statistikası təşkil edilsin. 

Seminarın işində DGK təmsilçisi iştirak etməyib. O, jurnalistlərin idxal mallarının bəyannamə qiymətinin aşağı olması barədə sualına cavab verə bilərdi. Bu, Azərbaycanın xarici ticarət əlaqələrinin real həcminə mənfi təsir edir. 08C