Ekspert: cari ildə ixrac iki dəfə azalıb

Bakı/18.05.17/Turan: Bu il Azərbaycandan kənd təsərrüfatı məhsullarının ixracı 44% artıb. Bunu kənd təsərrüfatı naziri Heydər Əsədov "Yeyinti sənayesi" XXIII Azərbaycan beynəlxalq sərgisi - Worldfood Azerbaijan 2017 və "Kənd təsərrüfatı" XI Azərbaycan beynəlxalq sərgisinin - Caspianagro 2017 dünən paytaxtın Ekspo Mərkəzində keçirilmiş açılışında elan edib.

O cümlədən, qeyd edilib ki, bu ilin I rübündə kənd təsərrüfatı məhsullarının ixracı ötən ilin müvafiq dövrü ilə müqayisədə 44% artıb. Burada söhbət bitkiçilik məhsulları, həmçinin meyvə-tərəvəz ixracından gedir. Eyni zamanda, KTN-nin başçısı gələcəkdə də bu istiqamətdə artımın olacağını və vəziyyətin ildən-ilə yaxşılaşacağını proqnozlaşdırıb. "Nazirin fikirlərinə dərindən hörmət edirəm, amma sadə insanlar belə düşünə bilər ki, bu sahədə həqiqətən əhəmiyyətli irəliləyiş əldə olunub. Buna görə də hesab edirəm ki, bu məqam ətraflı araşdırma tələb edir", - deyə kənd təsərrüfatı sahəsində ekspert Vahid Məhərrəmov "Turan"a bildirib. Müsahibimizin sözlərinə görə, aşağıdakı hesablamalar rəsmi məlumatlara əsaslanır:

"Buna qədər uzun illər ərzində ölkənin hər dörd ayda $200 mln. dəyərində ərzaq və kənd təsərrüfatı məhsulları ixrac etdiyini nəzərə alsaq, görərik ki, cari ildə 2 dəfə azalma müşahidə olunur. Və əgər ötən illərin ilk dörd ayında ölkəmiz xaricə $13,8 mln. məbləğində şəkər, $79,5 mln.-lıq çay göndəribsə, cari ilin I rübündə çay ixracı $2,8 mln., şəkər göndərişi isə $13,6 mln. dəyərində olub. Gördüyünüz kimi, bu il çay ixracı 5 dəfə, şəkər göndərişi isə 6 dəfə azalıb. Məsələn, 2012-ci ilin ilk 4 ayı ərzində xaricə bitki və heyvan mənşəli yağ və piy satışı $76,3 mln. həcmində olubsa, bu il həmin sahədə ixrac 15 dəfə azalaraq $5 mln. səviyyəsinə enib"

V. Məhərrəmovun hesablamalara görə, bu şəraitdə ət, süd, meyvə, çay və digər məhsulların idxalı xeyli artıb: "Bu ilin I rübündə ət idxalı 2,6 dəfə, diri çəkidə gətirilən ət - 48%, süd idxalı - 98%, un məmulatları -20%, meyvə - 7%, çay - 29%, şəkər - 13%, digər ərzaq məhsullarının idxalı - 45% artıb.

2013-cü ilin dörd ayında ölkəyə 317 mln. 522 min dollarlıq ərzaq gətirilibsə, bu il biz xaricdən artıq $412 mln. 849 min dəyərində məhsul almışıq. Beləliklə, hesabat dövründə əvvəlki illərdə olduğu ilə müqayisədə ixracımız $100 mln. həcmində azalıb və bu qədər də ərzaq idxalının göstəriciləri artıb". Ekspertin fikrincə, vəziyyətin mürəkkəbliyi ondadır ki, yerli istehsalın azalması səbəbindən ildən-ilə ərzaq idxalından asılılıq artır.

Bir qədər bundan əvvəl KTN məlumat yaymışdı ki, 2017-ci ilin yanvar-mart aylarında $80 mln. 234,1 min məbləğində, yəni keçən ilin müvafiq dövründə olduğundan 57,7% çox kənd təsərrüfatı məhsulları ixrac edilib.

O cümlədən, bildirilirdi ki, ölkə $34 mln. 951,3 min məbləğində (artım 19,9%) 29,548 min ton meyvə (artım 58,5%) və $20 mln. 449,9 min məbləğində (artım 44,9%) 26,037 min ton tərəvəz (artım 92,7%), həmçinin $ 17 mln. 152 min məbləğində (artım - 8 dəfə) 12,515 min ton pambıq (artım- 6,5 dəfə) ixrac edib.

2017-ci ilin I rübündə ixraca $2 mln. 193,7 min məbləğində (artım 58,7%) 994,4 min vahid (azalma 33,1%) dəri xammalı, $3 mln. 898,3 min məbləğində (artım 6,8%) 1,164 min ton (artım 35,4%) tütün yönəldilmişdir. Keçən il ASK $426 mln. 111,7 min dəyərində məhsul ixrac edib ki, bu da 2015-ci ilin müvafiq göstəricisindən 20,7% çoxdur. -0-