Ekspert Mərkəzi Bankın nəzdində Problemli kreditlər üzrə Fond yaradılmasını təklif edir

Əgər hökumət dollar krediti götürənlərə kompensasiya vermirsə, onları gələcək devalvasiyadan qorumaq barədə düşünməlidir, deyə maliyyə üzrə ekspert Samir Əliyev bildirir.

Turan-ın məlumatına görə, Samir Əliyev Facebook səhifəsində qeyd edib ki, indiki vəziyyətdə Mərkəzi Bankın nəzdində Problemli kreditlər üzrə Fond yaradılması məqsədəuyğun ola bilər.

«Fond dollar kreditlərinin manata konvertasiyası mexanizmlərindən biri ola bilər. Fondun əsas məqsədi bankların kredit portfelinin yaxşılaşdırılmasını təmin etmək olmalıdır», - deyə ekspert hesab edir.

Onun fikrincə, Mərkəzi Bank Fondun kapitallaşması üçün manat vəsait ayırmalı, Fond da öz növbəsində kommersiya banklarına uzun müddətə (məsələn, 20 il), aşağı faizlə (məsələn, illik 3%) depozit yerləşdirməlidir.

«Həmin depozitlər dollar kreditlərinin yenidənmaliyyələşdirilməsinə yönldilir və dollar kreditlərinin manata konvertasiyasını təmin edirlər. Qazaxıstanda oxşar mexanizm ipoteka kreditlərinə münasibətdə tətbiq edilir”, deyə Əliyev qeyd edir.

Ekspert bildirir ki, dolların manata nisbətdə məzənnəsi artır və bu proses davam edəcək. Deməli, paralel olaraq dollar krediti olan vətəndaşların qayğıları artır.

İyulun 1-i tarixinə xarici valyutada olan istehlak kreditlərinin həcmi 2 milyard 247 milyon manatdır. Onun 227,4 milyon manatı ödəniş kartlarının payına düşür.

«Manatın məzənnəsinin son aylar ucuzlaşması tendensiyası (ayda təxminən 3%) göstərir ki, əhalinin aylıq ödəniş yükü ayda ən azı 50-60 milyon manat artır. Təsəvvür edin ki, manatın cəmi 10% ucuzlaşması əhalinin xərclərini 200 milyon manat artıra bilər. Bankların isə təkcə əmanətdən zərəri 630 milyon manat artar”, deyə ekspert qeyd edir. 71B