Əlil bir il sonra sığorta kompensasiyası alıb

İcbari Sığorta Bürosu tərəfindən yol-nəqliyyat hadisəsinə görə 1,5 min manat kompensasiya ödənilib. İSB-nin məlumatında deyilir ki, “İcbari sığortalar haqqında” qanununun 32, 33-cü maddələrinə əsasən Azərbaycan Respublikasının vətəndaşına 27  fevral 2013-cü il tarixdə baş vermiş yol-nəqliyyat hadisəsində  az ağır  xəsarətlər almasının 2-ci qrup əlilliyə səbəb olması ilə əlaqədar  1500 (bir min beş yüz) manat  məbləğində kompensasiya verilib. Ödəniş poçt vasitəsi ilə 10 aprel 2014-cü il tarixində həyata keçirilib.

Əvvəllər məlumat verildiyi kimi, ISB ötən il YNH hadisələri üzrə 54,39 min manat kompensasiya ödəyib.

İcbari Sığorta Bürosu 16 dekabr 2011-ci ildə yaradılıb. Hazırda 12 üzvü var.

Büronun maliyyə vəsaitləri üzvlük haqlarından, hər icbari sığorta növlərinə dair zəmanət depoziti, həmçinin sığorta şirkətlərinin hər ay büroya köçürəcəyi icbari növlərə görə ümumi mükafatların həcminin 5%-dən formalaşır.

Büroya üzvlük haqqı 200 min manatdır. Büronun daşınmaz əmlakın icbari sığortası və daşınmaz əmlak sahiblərinin məsuliyyətinin icbari sığortası üzrə üzvləri üçün birdəfəlik depozit hərəyə 100 min manatdır. Avtonəqliyyat sahiblərinin mülki məsuliyyətinin icbari sığortası və sərnişinlərin icbari sığortasına dair birdəfəlik depozit hərəyə 200 min manatdır. --17D—