Fərdi əmək müqavilələrinin elektron informasiya sistemi yaradılır

Bundan sonra əmək münasibətləri fərdi əmək müqaviləsi yaranandan sonra yox, əmək müqaviləsi qeydiyyata alınıb işəgötürənə məlumat veriləndən sonra yaranacaq. Əmək Məcəlləsinə müvafiq dəyişiklik 3 fevraldan qüvvəyə minib. 

Dövlət başçısının verdiyi fərmana əsasən, Nazirlər Kabineti bir ay müddətinə  fərdi əmək müqavilələrinin elektron informasiya sisteminin yaradılması üçün normativ bazanın qəbulunu btəmin etməlidir. Bu il iyulun 1-dək bütün mövcud informasiyalar sistemə daxil edilməlidir. 

Əmək müqaviləsi bildirişi əmək müqaviləsinin bağlanılmasının, ona dəyişiklik edilməsinin və ya xitam verilməsinin Əmək və Əhalinin Sosial Müdafiəsi Nazirliyinin elektron informasiya sistemində elektron qaydada qeydiyyata alınması məqsədi ilə işəgötürən tərəfindən həmin elektron informasiya sisteminə daxil edilən elektron sənəddir. 

Vergilər Nazirliyinin əmək müqavilələrinin elektron informasiya sisteminə çıxış  imkanı olacaq. Bundan başqa, Əmək və Əhalinin Sosial Müdafiəsi Nazirliyi real vaxt rejimində Ədliyyə Nazirliyi və DSMF ilə informasiya mübadiləsi edəcək. 

Əmək Məcəlləsinə digər dəyişikliyə əsasən, əmək müqaviləsinə daxil edilən informasiyalar genişləndiriləcək. Bu isə qeyri-leqal məşğulluğun aradan qaldırılmasına kömək edəcək. 

Vergilər Məcəlləsinə edilən dəyişikliyə əsasən, əmək müqaviləsi hüquqi qüvvəyə minmədən işəgötürən tərəfindən fiziki şəxslərin gəlirlərinin gizlədilməsinə (azaldılmasına) şərait yaradan işəgötürən 1000 manat məbləğində cərimələnəcək. 

Dövlətstatkoma görə, ölkədə muzdlu işçi sayı 1 505 min nəfərdir. 

2012-2013-cü illərdə Vergilər Nazirliyi və  Əmək və Əhalinin Sosial Müdafiəsi Nazirliyinin Əmək Müffəttişliyi 200 min qeyri-leqal məşğulluq faktı aşkarlayıb. 08D