Fevralda birja valyuta dövriyyəsi dörddə bir azalıb

Bakı Banklararası Valyuta Birjasının (BBVB) valyuta bölməsində hərrac həcmi 2013-cü ilin fevralında $41,277 mln və ya 32,384 mln manat olub. 

Bu, ötən ayla müqayisədə 24,1%, 2012-ci ilin fevralı ilə müqayisədə də 12,9% azdır. 

Hesabat dövründə hərracların birja elektron sistemində hər bir əqdin orta həcmi USD/AZN üzrə $1,720 mln, orta günlük dövriyyə $2,064 mln olub. 

2013-cü ilin fevralında BBVB valyuta bölməsinin hərraclarında 9 bank iştirak edib. Hesabat ayında BEST-də 40 hərrac sessiyası keçirilib və 24 əqd qeydiyyata alınıb. 

İki ayda birja valyuta dövriyyəsi 75,035 mln manat olub. Bu, ötən ilin eyni dövründəkindən 26,4% azdır. 

Milli valyutanın birja məzənnəsi hesabat ayında 1 USD üçün 0,04% düşərək 0,7834-dən 0,7837-ə enib. Manatın ABŞ dollarına nisbətdə orta ölçülmüş məzənnəsi 1 USD üçün 0,7845 AZN təşkil edib. 

2013-cü ilin fevral ayında BEST sistemi çərçivəsində fəaliyyət göstərən Mütəşəkkil Banklararası Kredit Bazarında (MBKB) hərracların ümumi həcmi manat ekvivalentində 2 milyon təşkil edib. 

Market-meyker statusu alan banklar tərəfindən cari ilin fevral ayında 90 günlük alət üzrə verilən sifarişlər əsasında hesablanan BakİBOR indeksi manat vəsaitləri üzrə illik 11,50%, ABŞ dolları üzrə isə 12,11% təşkil edib. BakİBİD tarifi 90 günlük müddətində manatla illik 5,99% və ABŞ dolları ilə 5,63% təşkil edib. --15B--