Hökumət Qarabağa böyük dönüş üçün plan hazırlayır

Bakı/ 30.10.20/Turan:  Azərbaycan ordusu sentyabrın 27-də başlayan döyüşlərdə  Füzuli, Tərtər, Cəbrayıl, Zəngilan, Qubadlı bölgələrini və Dağlıq Qarabağda kəndləri olan Hadrut şəhərinin Ermənistan tərəfindən işğal edilmiş geniş ərazilərini azad edib. Bu bölgələrdən olub televiziya kanallarında çıxış edən azərbaycanlı qaçqınlar 1992-1994-cü illərdə qaçmağa məcbur olduqları yaşayış məntəqələrinə qayıtmaq niyyətlərini bildiriblər.

“Turan” Agentliyi Qaçqınların və Məcburi Köçkünlərin İşləri üzrə Dövlət Komitəsinə məcburi köçkünlərin ordu tərəfindən azad edilmiş bölgələrinə köçürülməsinin şərtləri barədə suallarla müraciət edib. Dövlət Komitəsinin Beynəlxalq əlaqələr, informasiya və mətbuat xidmətinin telefon nömrəsi (N 530 8237) sorğunu cavablandırmayıb. Əməkdaşlar 29 və 30 sentyabr tarixlərində iki dəfə zəng edib cavabları bildirəcəyinə söz verdilər, lakin vədlərini yerinə yetirməyiblər.

Bir neçə il əvvəl Qaçqınların və Məcburi Köçkünlərin İşləri üzrə Dövlət Komitəsinin əməkdaşı xüsusi söhbətində “Turan”a bildirib ki, bu qurumun məcburi köçkünlərin Qarabağa kütləvi qayıtması üzrə planı var. Planda köçkünlərin sayı, daşınması üçün tələb olunan avtobusların sayı və köçürülmə yerləri nəzərə alınır. Geri qayıtma prosesi Daxili İşlər Nazirliyinin iştirakı ilə qanunun aliliyi və vətəndaşların Bakıda və Azərbaycanın digər şəhər və kəndlərində müvəqqəti yaşadıqları illərdə əldə etdikləri daşınmaz əmlak hüquqlarına uyğun olaraq həyata keçiriləcək.

Füzuli rayonundan millət vəkili, Milli Məclisin Əmək və Sosial Siyasət Komissiyasının üzvü Vüqar Bayramov mətbuata verdiyi müsahibədə insanları Qarabağa köçürməzdən əvvəl bölgələrin aqrar imkanlarını yerindəcə qiymətləndirmək, əraziləri minalardan təmizləmək, sonra azad olunmuş bölgələrin infrastrukturunu yaratmaq lazım olduğunu izah edib. Orada yaşayış, inzibati və sosial binalar tikilənə, iş yerləri açılana qədər gözləmək lazım gələcək.

İlk növbədə Ermənistanın təcavüzü nəticəsində bu bölgələrdən çıxarılmış və indi yataqxanalarda yaşayan vətəndaşlar oraya köçəcəklər. Məcburi köçürülmə olmayacaq, hakimiyyət könüllü köçmə prinsipindən çıxış edəcək. Bundan sonra vətəndaşları azad edilmiş bölgələrə köçməyə təşviq etmək üsulları tətbiq ediləcək, deyə Bayramov əlavə edib.—0—