İnflyasiya illik hesablamada 2,2% olub

Dövlətstatkom bu ilin yanvarında illik hesablamada istehlak qiymətlərinin 2,2% artdığını qeydə alıb. Müstəqil ekspertlər bununla razı deyil və hesab edirlər ki, hökumət süni şəkildə inflyasiyanı «dayandırır».

Dövlət Statistika Komitəsində Turan-a bildiriblər ki, bu ilin yanvarında 2013-cü ilin eyni ayı ilə müqayisədə ərzaq 2,6%, qeyri-ərzaq malları 3,5%, pullu xidmətlər 0,2% bahalanıb. 

«Milli Büdcə Qrupu» QHT koalisiyasının üzvü Məhəmməd Talıblı Turan-a deyib ki, beynəlxalq standartlara uyğun müstəqil qiymət monitorinqi yoxdur. Hətta subyektiv qiymətlər göstərir ki, ilkin tələbat malları (qida, paltar, yanacaq) il ərzində 7-9% bahalanıb.

Hökumətyönlü KİV-lərdən birinin əməkdaşı da rəsmi rəqəmlərlə razı deyil. «Memar Əcəmi» metrostansiyasının yaxınlığında yaşayıram. Bir il əvvəl “Xruşşovka”da 2 otaqlı mənzil 50 min manat idi, indi 64 min manatdır».  

«Respublika Alternativi» (ReAl) Hərəkatının İH üzvü Natiq Cəfərli hesab edir ki, hökumət inflyasiya göstəricilərini azaltmaqda maraqlıdır. İctimaiyyət isə bununla barışmağa məcburdur, çünki alternativ yoxdur. «Əgər hökumət gerçək inflyasiya göstəricilərini açıqlasa, məlum olar ki, qiymət artımı əhalinin real gəlirlərindən çox yüksəkdir. Bundan başqa, hökumət pensiyaların sığorta hissəsinin indeksləşdirilməsində pensiyaçılar qarşısında məsuliyyət daşıyır. İnflyasiya nə qədər aşağı olsa, indeksləşdirmə də aşağı olacaq», deyə Cəfərli qeyd edib.    

2013-cü ildə ölkədə rəsmi inflyasiya 2,4% olub. Bu il hökumət istehlak qiymətlərinin 3,5% artacağını gözləyir. 08B