İqtisadiyyat Nazirliyi investisiya pullarının hara xərcləndiyi barədə hesabat verib

İqtisadiyyat Nazirliyi 2016-cı ildə bu quruma dövlət büdcəsindən investisiya məqsədi ilə ayrılan pulların istifadəsi barədə informasiyanı açıqlayıb.

İqtisadiyyat Nazirliyi 58,6 mln manatın bölünməsi üzrə dövlət sifarişçisi olub. İl ərzində 53 mln manatdan çox vəsait təyinatı üzrə xərclənib, deyə qurumun məlumatında bildirilir.

Sumqayıt Kimya Sənaye Parkının yaradılmasına 30 mln manat, SKSP yanında İxtisas Mərkəzinin yaradılmasına 2 mln manat xərclənib.

Bərk Məişət Tullantılarının Vahid İdarəetməsi layihəsi çərçivəsində il ərzində ayrılan 3,6 mln manat vəsaitin 2,6 mln manatı xərclənib,

İqtisadiyyat Nazirliyinin hesabatına əsasən,  Məişət Tullantılarının Yandırılması Zavodunun tikintisinə ayrılan 6,2 mln manat vəsaitin 5,8 mln manatından istifadə edilib. Bu zavod 2012-ci ilin dekabrında istismara verilib.

Bakıda “MilanExpo” pavilyonu tikilir. Tikintinin yeri və smetası açıqlanmır. Ötən il onun tikintisinə 12 mln manat xərclənib.

Pirallahı Sənaye Parkının yaradılması üçün ayrılan vəsait istifadə edilməyib: 4 mln manatdan cəmi 10 min manat xərclənib.

Bundan başqa, 2016-cı ildə İqtisadiyyat Nazirliyi əvvəlki illərdə dondurulan 76 mln manatın 17,5 mln manatından istifadə edib. Maraqlıdır ki, metallurgiya kompleksi üçün 5 mln manat ayrılsa da, konsultasiya xidmətindən başqa bu istiqamətdə heç bir addım atılmayıb.

İqtisadiyyat Nazirliyi 2016-cı ildə SKSP-da işlər üçün əlavə 2,7 mln manat, MTYZ-nin tikintisi üçün 6,1 mln manat, biometrik pasportların alınması üçün 2 mln 270 min manat və Mingəçevir Sənaye Parkının yaradılması üçün 2 mln manat xərcləyib. 08D