İstehsal etdiyimizdən çox şokolad ixrac edirik

Bu ilin 5 ayında Azərbaycanda rəsmi şokolad istehsalı həcmi 744,5 ton olub, deyə Dövlətstatkomda Turan-a bildiriblər. Amma real istehsal xeyli çoxdur. Bunu həmin məhsulun ixracı barədə gömrük statistikası da sübut edir.

Gömrük Komitəsinin məlumatına görə, I rübdə yerli istehsalçılar müxtəlif ölkələrə (Özbəkistan, Türkmənistan, İraq, Gürcüstan, Monqolustan, RF və s.) $2,9 mln məbləğində 975,6 ton şokolad ixrac ediblər.

Bu dövrdə Avropa, Rusiya, Ukrayna və s ölkələrdən 8,1 min ton şokolad idxal edilib. Maraqlıdır ki, Azərbaycan şokoladı 3$/kq-a ixrac edilir, idxal qiyməti isə 2$/kq-dan azdır.

Azərbaycanda əsas şokolad istehsalçıları “Ulduz” və “Şirin” qənnadı fabrikləridir. Naxçıvanda da şokolad fabriki var. 2014-cü ildə o, istehsal həcmini 29 ton artıraraq 1732 tona çatdırıb.

DSK-ya görə, 2014-cü ildə ölkədə şokolad istehsalı 5,2 min tondan (2013-cü il)  4 min tona azalıb. Qiymət ifadəsində istehsal 10,8 mln manat təşkil edib. DGK-ya görə, ötən il istehsal edilən şokoladın hamısı ixracata gedib. 2013-cü ildə ixrac həcmi (5483,8 ton) yerli istehsal həcmindən 279 ton çox olub. Görünür, bu, gizli iqtisadiyyatın nəticəsidir.

2013-cü ilin ərzaq balansına əsasən, Azərbaycanda şokoladın istehlak həcmi 24,6 min ton olub. Bir adama ildə 2,6 kq şokolad düşüb. 2013-cü ildə Rusiyada bu göstərici 4,36 kq olub.  

Ötən il Azərbaycanda şokolad idxalı həcmi 24 718,4 ton olub. Bu, 2013-cü ildəkindən 7,4% azdır. İdxala birbaşa xərclər $43 mln təşkil edib. Bu, 2013-cü ildəkindən $3,7 mln azdır.

Müqayisə üçün deyək ki, 2012-2014-cü illərdə Gürcüstan xaricdən $53 mln 80,5 min, $62 mln 159,7 min və $59 mln 589,2 min məbləğində şokolad idxal edib.  08B