Kənd təsərrüfatı məhsullarının idxalı ixracdan 4 dəfə çoxdur

Bakı/18.04.17/Turan: Üç ayda kənd təsərrüfatı məhsullarının ixracı 44% artıb, deyə dövlət başçısı Yevlaxda müşavirə zamanı bildirib. İqtisadi Tədqiqatlar Mərkəzinin hesablamasına görə, kənd təsərrüfatı məhsullarının idxalı ixracdan 4 dəfə çoxdur. İxrac isə ötən il nisbətən artsa da, 2014-cü ildəkindən xeyli azdır.

«Bu ilin ayında 69,4 mln dollarlıq kənd təsərrüfatı məhsulları ixrac edilib. Bu, məbləğcə ötən ilin eyni dövründəkindən 12,4 mln dollar çoxdur», - deyə İTM aqrar departamentinin rəhbəri Vahid Məhərrəmov Turan-a bildirib. Amma müsbət dinamika vəziyyətin görünən hissəsidir, ümumi analizdə nikbinlik yoxdur.

«Bu il kənd təsərrüfatı məhsullarının ixracı artsa da, 2014-cü ilin eyni dövrünə nisbətən 2 dəfə azdır.  2014-cü ilin I rübündə 144, 8 mln dollarlıq kənd təsərrüfatı məhsullarının ixrac edilib. Göründüyü kimi, bu il 2 dəfə azalma var. Amma 2017-ci ilin I rübündə 298 mln 557 min dollarlıq idxal olub. İdxalın həcmi ixracdan 4,3 dəfə çoxdur. Ona görə 44% artımdan danışmaq yerinə düşmür», - deyə Məhərrəmov bildirib.     

Xaricdən məhsul tədarükünün artan həcmləri fonunda ərzaq idxalı seqmentində və məhsulun topdan tədarükündəki inhisarlar bazarda qiymətlərin artımını təhrik edirlər.  

“Azərbaycanda ərzaqların qiyməti digər ölkələrlə müqayisədə 30-40% çoxdur, bəzi mövqelərdə qiymətlər iki dəfə çoxdur. Buna səbəb idxalın və pərakəndə bazarların inhisara alınmasıdır. Optimal qiymətlər rəqabətli bazar şəraitində mümkündür”, - deyə ekspert hesab edir. 

Xatırladaq ki, ixracatçıların respublika müşavirəsində qeyri-neft iqtisadiyyatda 2,4% artım olduğu bildirilib. Ölkənin qeyri-neft sənayesində 2%, kənd təsərrüfatında 3,5% artım olub. Ticarət dövriyyəsi 15%, ixrac 50% artıb. İdxal 17% azalıb; kənd təsərrüfatı məhsullarının ixracı 44% artıb, xarici ticarətin müsbət saldosu $1 mlrd 93,532 mln olub. –0—