Mərkəzi icra hakimiyyəti orqanları seçkiöncəsi yarışa qoşulub

Bu gün “Bakı Expo” Sərgi Mərkəzində Azərbaycanın son 10 ildə əldə etdiyi uğurlara həsr olunmuş “Azərbaycan 10 ildə. Sosial-iqtisadi inkişaf: dövlət proqramlarının icrası” sərgisi açılıb. Bu təşviqat sərgisinin təşkilini mərkəzi icra hakimiyyəti orqanlarının prezident seçkiləri öncəsi prezident İlham Əliyevə dəstəyi kimi qiymətləndirmək olar. 

İqtisadi İnkişaf Nazirliyinin yaydığı məlumatda deyilir ki, sərgi 3 pavilyonda keçiriləcək və ölkənin sənaye, energetika, İKT, kənd təsərrüfatı, sahibkarlıq, regionların sosial-iqtisadi inkişafı, nəqliyyat, turizm, fövqəladə hallar, şəhərsalma, səhiyyə, elm və təhsil, mədəniyyət, gənclər və idman, ekologiya, su və kanalizasiya və digər sahələrdə qazandığı nailiyyətlər, eləcə də müxtəlif kənd təsərrüfatı və sənaye məhsulları nümayiş olunacaq. Ziyarətçilər sərginin açıq havada təşkil edilən hissəsində bir sıra texnika və avadanlıqlar, Azərbaycanda istehsal olunan məhsullarla tanış olacaqlar.

Sərgi 15-ci ilə kimi davam edəcək. Onu dövlət büdcəsindən maliyyələşdirirlər. Sərginin birinci günü sahibkarlığın inkişafı, regionların sosial-iqtisadi inkişafı barədə İqtisadi İnkişaf Nazirliyinin nümayəndələri danışacaqlar. Sərgi çərçivəsində müxtəlif dövlət qurumlarının günlərinin keçirilməsi də nəzərdə tutulur.  

15 oktyabr 2003-cü ildə müxalifət partiyalarının legitimliyini tanımadığı İlham Əliyev prezident kürsüsünə əyləşib. 2004-cü ilin fevralında regionların sosial-iqtisadi inkişafı üzrə I dövlət proqramı qəbul edilib. Ona əsasən, ölkədə 600 min yeni iş yerlərinin açılması nəzərdə tutulurdu. 2014-cü ilin əvvəlində ikinci proqramın müddəti bitir. Bu gün ödvlət başçısı bəyan edir ki, ölkədə 1 180 000 yeni iş yerlərinin açılıb. Müstəqil ekspertlərə görə, bu rəqəm şişirdilib və ən azı iki dəfə şişirdilib. 08D