Məxfi əcnəbilər Azərbaycan iqtisadiyyatına daha $250 mln qoyacaq

Xarici "Mercury Investment & Holdings ltd" Azərbaycanda $250 mln istiqraz emissiyası buraxmaq istəyir, - deyə Qiymətli Kağızlar üzrə Dövlət Komitəsi (http://www.scs.gov.az/new/?sec=news&type=4&lang=1&id=645) məlumat verir.

QKDK 28 fevralda şirkətin nominalı $100 olan 2,5 mln istiqraz emissiyasını qeydiyyata alıb. Yerləşdirmə qapalıdır.  

Bu, şikətin məqsədini açıqlamadan ölkəyə ilk sərmayəsi deyil. Bu isə pul yuyulması olduğunu da göstərir. Belə ki, 7 avqust 2012-ci ildə $200 mln, ötən ilin 15 iyulunda $250 mln istiqraz yerləşdirib. Ötən ilin 15 noyabrında $70 mln həcmində emissiya yerləşdirilib.

QKDK-da Turan-a deyiblər ki,  "Mercury Investment & Holdings ltd" Men adasında hüquqi şəxsdir. Komitədə sirli “əcnəbilərin” layihələrini qapalı hesab edirlər.

Turan müxbiri müəyyən edib ki, "Mercury Investment & Holdings ltd" 2005-ci ildə təsis edilib. "Baku Steel Company" (BSC) MMC də orda qeydiyyata alınıb.

Prezident İlham Əliyev 2014-cü ili sənaye ili elan edib. O, metallurgiya kompleksinin inkişafına da diqqət çəkib. Bu kontekstdə Hövsanda 750 min ton gücündə poladəritmə müəssisəsi tikintisi ideyası uyğun gəlir. Onun tikintisi və texniki təchizatında Siemens AG şirkəti iştirak edir.

Ötən il bu şirkət BSC ilə gücü 1 mln ton olan kompleks tikmək barədə saziş imzalayıb.

İstisna olunmur ki, "Mercury Investment & Holdings ltd" bütün investisiyaları ($770 mln) bu layihəyə qoyur. --17D-