Milli Məclis istehsalçıları müdafiə edəcək

Milli Məclisin iqtisadi siyasət komitəsi «Antidempinq, kompenasiya və mühafizə tədbirləri haqqında» qanun layihəsi hazırlayıb. Layihə Milli Məclisin fevral ayının 12-də keçiriləcək plenar iclasında birinci oxunuşda müzakirə olunacaq.

O, yerli istehsalçıları idxal mallarının dempinq (ifrat ucuzlaşdırılmış qiymət) qiymətindən qoruyacaq.

Yeni qanuna əsasən, ixracatçı ölkənin daxili əmtəə dövriyyəsində analoji məhsul olmayanda və ya bu məhsulun satış həcmi ixrac həcminin 5%-dən az olanda dempinq marjası məhsulun ixrac qiymətinin bu məhsulun üçüncü ölkəyə ixrac qiyməti iıə müqayisəsi yolu ilə müəyyən ediləcək.

Əgər bu məhsulun satışı ixracatçı ölkənin ərazisində azı yarım il ərzində məhsulun normal dəyərini müəyyənləşdirməyə imkan verən həcmin 20% həcmində satılıbsa, bu məhsulun normal dəyərini müəyyənləşdirmək üçün əsas deyil. 

Yerli istehsala dempinq yaxud subsidiyalı idxalın yerli istehsala təsiri idxalın həcminin təhlili, yerli məhsulun qiymətinə təsiri, idxal edilən və yerli malın qiymətindəki fərq, dempinq marjası və digər göstəricilərlə müəyyən ediləcək. 

Dempinq qiymətlərinə qarşı tədbirlər yalnız yoxlama başlanandan 2 ay sonra əsaslı araşdırmadan sonra tətbiq edilə bilər. Onlar müvəqqəti antidempinq yaxud kompensasiya rüsumu, həmçinin qeyd edilən rüsumlara uyğun pul depoziti şəklində ola bilər. 

Bu tədbirlərin tətbiqi müddəti - 5 ildən çox olmadan 4 aydan 9 aya qədərdir.  -- 17D—