NIKOIL BANK deputata qarşı iddia ilə bağlı məsələyə aydınlıq gətirib

Bir sıra KİV-də NIKOIL BANK-ın Milli Məclisin deputatı Rafael Cəbrayılov, Elşən Cəbrayılov, Rauf Cəbrayılov və Akif Amanaliyevə qarşı məhkəmə iddiasına dair səhv məlumat dərc edib. Bankdan verilən məlumata görə, informasiya agentliklərinin yaydığı səhv relizdə qeyd olunub ki, NIKOIL BANK Bakı Apellyasiya Məhkəməsinin qərarı ilə bağlı kassasiya şikayəti ilə müraciət edib və o təmin olunmayıb. Əslində isə Bakı Apellyasiya Məhkəməsinin 2012-ci il mayın 29-da NIKOIL BANK-ın xeyrinə çıxardığı qərara kassasiya şikayəti ilə bank deyil, cavabdehlər, yəni Rafael Cəbrayılov, Elşən Cəbrayılov, Rauf Cəbrayılov və Akif Amanaliyev müraciət ediblər. Onların şikayəti təmin olunmayıb və beləliklə noyabrın 13-də keçirilən AR Ali Məhkəməsinin Mülki Kollegiyasının iclasında cavabdehlərin kassasiya şikayətinin təmin olunmadığı qərarı çıxarılıb və əvvəlki məhkəmə instansiyasının Bankın xeyrinə çıxardığı qərar qüvvədə qalıb, - deyə məlumatda bildirilir. 

 NIKOIL BANK bank bazarında 1994-cü ildən fəaliyyət göstərir və bank xidmətlərinin tam paketini təklif edən universal maliyyə-kredit təşkilatıdır. -15D--