Oktyabrın sonunda ARDNŞ İsraildə qazma işlərinə başlayacaq

Oktyabrın sonunda ARDNŞ İsrailin Med Ashdod yatağında qazma işlərinə başlayacaq, deyə CDC (Caspian Drilling Company – ARDNŞ-nin törəməsi) baş direktoru Fərid Axundov "Novosti-Azərbaycan"a müsahibəsində bildirib.

“İsrailin “Şemen” (Med Ashdod) yatağının işlənməsinə hazırlıq başa çatıb və bu işlər üçün İsrail hökumətindən lisenziyalar alınıb”, - deyə Axundov qeyd edib. 

Onun sözlərinə görə, sazişə əsasən, CDC İsraildə 6000 metrlik iki kəşfiyyat quyusu qazacaq. İkinci quyunun qazılması investorlardan asılı olacaq. CDC bu layihədə İsrail konsorsiumu Shemen Oil & Gas Resources Ltd-nin (SMOG – keçmiş ACC Group) tərəfdaşıdır. 

CDC 2011-ci ilin fevralında SMOG ilə tərəfdaşlıq sazişi imzalayıb. Ona əsasən, CDC qazma işlərini idarə edəcək. Buna görə Med Ashdod-da 5% lisenziya verilib.

Hazırda İsrail bazarının aldığı neftin 30%-i BTC ilə Azərbaycandan gəlir. Türkiyə limanından neft tankerlərlə Aralıq dənizi vasitəsilə İsrailə çatdırılır. 

Qeyd edək ki, əvvəllər ARDNŞ təmsilçiləri bir quyunun qazılmasının qiymətinin $80 mln olduğunu bildiirb. 

* СDC şirkəti 1995-ci ildə ARDNŞ və Amerikanın Santa Fe şirkəti tərəfindən yaradılıb. Onun balansında Xəzərdə iki qazma qurğusu var. Bir neçə il əvvəl şirkət tamaən ARDNŞ-nin nəzarətinə keçib. İndi o, BP-Azerbaijan üçün “Azəri-Çıraq-Günəşli” və "Şahdəniz" layihələri çərçivəsində qazma işləri həyata keçirir. --12В--