Prezident gömrük sistemində islahatlara dair sərəncam verdi

Bu gün (4 mart) prezident İlham Əliyev gömrük sistemində islahatların davam etdirilməsi ilə bağlı əlavə tədbirlər haqqında sərəncam verib.

Sənədə əsasən, Nazirlər Kabinetinə  məcburi sertifikatlaşdırılmalı olan malların siyahısını iki ay müddətində azaltmaq tapşırılıb. Hökumət bu müddətdə həm də baytarlıq, fitosanitar və sanitariya nəzarətinə aid malların vahid siyahısını qəbul etməlidir.

Sərəncamda Dövlət Gömrük Komitəsinə, kənd təsərrüfatı və səhiyyə nazirliklərinə də tapşırıqlar verilib.

DGK  iki ay müddətində Gömrük Məcəlləsində nəzərdə tutulmuş bütün bəyannamələrin gömrük orqanlarında elektron formada qəbulunu təmin etməlidir. Məqsəd məmur-vətəndaş təmasının minimuma endirilməsidir.

İnnən belə komitə mal dövriyyəsini sürətləndirmək məqsədi ixracatçı ölkə tərəfindən verilən baytarlıq, fitosanitar, gigiyenik və digər sertifikatlar əsasında malların gömrük sərhədindən keçirilməsinə şərait yaradacaq və aidiyyəti dövlət orqanlarının bu barədə elektron formada məlumatdıracaq.

Vaxt itkisini aradan qaldırmaq məqsədi ilə qısa idxal bəyannaməsinin və ona əlavə olunmuş sertifikatların əvvəlcədən yoxlanılması və gömrük nəzarətinin həyata keçirilməsinin nəticəsi əsasında malların gömrük ərazisinə buraxılışını həyata keçirmək də DGK-ya həvalə olunub. Bu tələb mülki dövriyyəsi məhdudlaşdırılmış mallara da aiddir.

Mətbuatda son vaxtlar gömrük statistikası ilə bağlı müxtəlif ifşaedici materiallar dərc olunur. DGK-ya xarici ticarətin gömrük statistikasını beynəlxalq təcrübəyə və standartlara uyğun inkişaf etdirmək, onun düzgünlüyünü və operativliyini təmin etmək tapşırılıb.

DGK həmçinin iki ay müddətində gömrük rəsmiləşdirilməsi zamanı tələb olunan sənədlərin və prosedurların sayının minimuma endirilməsi ilə bağlı təkliflər hazırlamalıdır.

Malların və nəqliyyat vasitələrinin gömrük sərhədindən keçirilməsi üçün “Yaşıl dəhliz” və beynəlxalq təcrübədə mövcud olan digər buraxılış sisteminin yaradılmasını təmin edəcək qaydaların layihəsi də bu müddətdə prezidentə verilməlidir.

DGK dövlət sərhədinin buraxılış məntəqələrindən şəxslərin, nəqliyyat vasitələrinin, yüklərin və digər əmlakın buraxılışı zamanı sərhəd və gömrük orqanlarının səlahiyyət bölgüsü barədə təkliflər hazırlamalıdır. 

Dövlət sərhədindən keçidlə bağlı olan bütün dövlət qurumlarının informasiya resurslarının inteqrasiyası də yaxın vaxtlarda aparılması nəzərdə tutulan tədbirlər sırasındadır.

Eyni zamanda altı ay müddətində gömrük borcu üzrə ödənişlərin həyata keçirilməsi məqsədi ilə gömrük sərhəd buraxılış məntəqələrində poçt şöbələrinin yaradılacaq. 08D