"Qaz OPEK-i" baş katibinin Azərbaycan qazının Avropaya tədarükü barədə sensasiyalı bəyanatı

Azərbaycan qazının Avropaya tədarükü 2022-2025-ci illərdə başlayacaq, deyə «İzvestiya»ya müsahibəsində Qaz ixrac edən ölkələrin Forumunun (GECF) baş katibi Səid Məhəmməd Adeli bildirib.

Onun sözlərinə görə, Azərbaycan qazının Avropaya tədarükü 2022-2025-ci illərdə, İran qazının tədarükü daha gec başlayacaq.

Jurnalistin “Bu, siyasi gediş - Rusiya qazından Azərbaycan və ya İran qazının xeyrinə imtinadır?” sualına cavab olaraq "Qaz OPEK-i"nin baş katibi deyib ki, “heç bir iqtisadi səbəb görmür”.

Onun sözlərinə görə, İran qazının maya dəyəri rus qazından yüksəkdir [İran qazının min kubmetri $50; “Qazprom”a görə, 2014-cü ildə onun hasilatının maya dəyəri isə 1435 rubl olub. 2015-ci ildə devalvasiya ilə bağlı $30-a düşüb], yeni qaz kəmərləri, o cümlədən TANAP hələ yavaş tikilir.

"Müşahidələrimə görə, İran maye qazına üstünlük vermək istəyir, Asiyaya Ərəbistan dənizi vasitəsilə qaz tədarükü ona daha sərfəlidir. İran qazının Türkiyə vasitəsilə nəqli üçün hələ zəmin yoxdur", - deyə Səid Məhəmməd Adeli bildirib.

Turan-ın arayışı: Azərbaycan hökuməti 2013-cü ildə “Şahdəniz-2” layihəsini təsdiq edib. 2018-cü ilin IV rübündə ilk qaz hasilatı gözlənilir. Layihə çərçivəsində ildə 16 mlrd kubmetr qaz çıxarılacaq. Bunun 6 mlrd kubmetri Türkiyəyə, 10 mlrd kubmetri Avropaya satılacaq. Son məlumata görə, Azərbaycan qazının Yunanıstana tədarükü 2020-ci ilin sonu üçün gözlənilir. –12D--