Qeyri-leqal məşğulluğa qarşı mübarizə davam edir

Dövlət Əmək Müfəttişliyi Xidməti və Vergilər Nazirliyi qeyri-leqal məşğulluğa qarşı mübarizəni davam etdirirlər. 

Cari ilin ilk üç ayında Xidmət tərəfindən 1895-i özəl sektora aid ümumilikdə 2231 müəssisə və təşkilatda əmək qanunvericiliyinə əməl olunmasına dövlət nəzarəti həyata keçirilib. Həmçinin vətəndaşlardan, müəssisə və təşkilatlardan daxil olmuş 941 ərizə və 289 sorğu araşdırılıb. Dövlət nəzarətinin həyata keçirilməsi və müraciətlərin araşdırılması zamanı iş yerlərində 4075 halda əmək qanunvericiliyinin pozulması faktı aşkar edilib, inzibati xətalara görə 78770 manat cərimə tətbiq olunub. Bu barədə Turan-a qurumun mətbuat xidmətindən məlumat verilib.

İşəgötürənlə işçilər arasında müqavilə olmadan işə cəlbolunma halları ticarət, ictimai iaşə və inşaat sektorlarında geniş yayılıb. Məsələn, bu il martın sonunda Qəbələ rayonunda “AzəriTrans” MMC-nin 1000-dən çox əməkdaşı əmək hüquqlarına riayət edilməsi, o cümlədən əmək müqavilələrinin bağlanması tələbi ilə tətil ediblər.   

Azərbaycanda 1,2 mln.-dan çox işçini birləşdirən Həmkarlar İttifaqları Konfederasiyası mövcuddur. Lakin qurumun fəaliyyəti gözə çarpmır.

Sahibkarlar bildirirlər ki, icbari dövlət sosial sığortası üzrə ayırmaların yüksək səviyyəsi (əməkhaqqı fondunun 25%-i, o cümlədən işəgötürənin hesabından 22%) onları bu qanunsuz addımı atmağa vadar edir.

İctimai təşkilatlar ayırmaların strukturunun işəgötürənlərin xeyrinə dəyişdirilməsini təklif edirlər ki, onlar üçün nəinki iş yerlərinin  leqallaşdırılması, həm də real əməkhaqqı ilə bağlı stimul yaradılsın.  08B