Rusiya əl yükləri ilə aparılan kənd təsərrüfatı məhsullarının ixracına qadağa qoyub

Rusiya Azərbaycandan əl yükləri ilə aparılan cüzi miqdarda kənd təsərrüfatı məhsullarının ixracına qadağa qoyub. Buna səbəb həmin məhsullara verilən müvafiq sənədlərin qarşı tərəfə təqdim olunmamasıdır.

RF Fitosanitar Nəzarət Qaydalarına əsasən, karantin altında olan məhsulların – meyvə və tərəvəzlərin çəkisi 5 kq-dan artıq deyilse və toxum materialı deyilsə, onların idxalı zamanı fitosanitar sertifikatların təqdim edilməsi tələb olunur.

Azərbaycan Dövlət Gömrük Komitəsinin mətbuat xidməti məsələni anlaşılmaz şəkildə izah edərək qeyd edib ki: “Ancaq beynəlxalq təcrübə və iki ölkə arasında sadəcə kənd təsərrüfatı məhsulları sahəsində həyata keçirilən idxal-ixrac əməliyyatlarının həcmi nəzərə alındıqda belə hallar istisna hesab olunur və təbii qarşılana bilər”.

DGK bildirir ki, iyun ayının ilk ongünlüyündə Azərbaycanda istehsal olunan kənd təsərrüfatı məhsullarının Rusiyaya ixracı zamanı yaranan problemlər ikitərəfli müzakirələrdən sonra tam aradan qaldırılıb. Rusiya tərəfi Azərbaycandan Türkiyə məhsullarının təkrar ixracının həyata keçirildiyindən şübhələnirdi.

Son üç gündə Azərbaycandan Rusiyaya 52 vaqon və 161 yük maşını ilə meyvə və tərəvəz göndərilib, deyə DGK bildirib. -0-