Sabah Bakıda «Turizm və səyahət» sərgisi açılır

13-cü Azərbaycan «Turizm və səyahət» sərgisi 3 apreldə Bakıda Ekspo Mərkəzdə start götürür.

Bu il sərgi eksponentlərinin tərkibi rekord həddədir: 38 ölkədən 351 şirkət, deyə sərginin meneceri Xəyalə Əliyeva bildirib. İştirakçıların 60%-i xarici şirkətlərdir, onlar Azərbaycan bazarı üçün təkliflər edəcək.

Sərgi iştirakçılarının 40%-i yerli şirkətlərdən ibarətdir. Milli stendlərin fəal iştirakı ilə yanaşı Argentina, Bolqarıstan, Macarıstan, Yunanıstan, Gürcüstan, Dominikan Respublikası, Misir, Zaqreb (Xorvatiya), Hindistan, İndoneziya, İtaliya, Çin, Malayziya, Mərakeş, Sloveniya, Stavropol Vilayəti (Rusiya), Tailand, Türkiyə, Rusiya, Fransa, Çernoqoriya və Çexiyadan 24 milli və regional qrup qatılacaq.

"AITF 2014" sərgisinin fəaliyyəti dövründə BMT-nin Ümumdünya Turizm Təşkilatı Avropa Komissiyasının 57-ci iclası və turizm klasterlərinin səmərəli inkişafı üzrə seminarın keçirilməsi də nəzərdə tutulub, deyə Mədəniyyət və Turizm Nazirliyinin şöbə müdiri Aydın İsmiyev bildirib.

Turan-ın ölkənin turizm potensialının xaricdə təbliği ilə bağlı suala cavab verən İsmiyev deyib ki, son 10 ildə hökumət Mədəniyyət və Turizm Nazirliyinin beynəlxalq turizm sərgilərində iştirakını, xarici telekanallarda reklam çarxlarını maliyyələşdirir. Bu sərgilərdə 20 yerli operator və agentlik öz məhsullarını təqdim edir.  

AITF-ilk 2 günü turizm sənayesi mütəxəssisləri üçün elan edilib. 5 apreldə sərgiyə giriş azad olacaq. AITF-lə birgə 8-ci Qafqaz Beynəlxalq Mehmanxana, Restoran və Supermarketlər üçün Avadanlıq və Ləvazimatlar sərgisi də keçiriləcək.

Mətbuat konfransında qeyd edilib ki, bu il «Tibbi turizm» istiqamətinin iştirakçıları artıb. Bundan başqa, sərgidə Kipr, Türkiyə və Avropa ölkələrinin daşınmaz əmlak xidməti təklif edən şirkətləri iştirak edir.

Tədbirin təşkilatçıları qismində "ItecaCaspian" MMC və onun Böyük Britaniyalı tərəfdaşı "ITE Groupplc" şirkətləri çıxış edirlər. 08C