Sahibkar Təşkilatları Milli Konfederasiyası Bakıda metalyayma müəssisələrinə hücumları pisləyir

İyulun ortalarından Bakı şəhəri ərazisində metalyayma ilə məşğul olan sahibkarlıq subyektləri arasında gərginlik səngimir. Bir qrup idman cüssəli gənc kiçik müəssisələrə hücum edərək onların fəaliyyətinin dayandırılmasını tələb edir, hazır məhsulları müsadirə edir. 

Yerli KİV baş verənləri diqqət mərkəzində saxlayır. Sahibkarlar bildirirlər ki, hücumu “Baku Steel Company” MMC-nin rəhbərliyi təşkil edir. Şirkət fiziki yolla qara metallurgiya bazasındakı iştirakını genişləndirməyə çalışır. Sahibkarlar hücumlardan müdafiə üçün hüquq-mühafizə orqanlarına müraciət ediblər. Lakin Baş Prokurorluq və Daxili İşlər Nazirliyi hələlik hər hansı əməli tədbir görmür. İqtisadi İnkişaf Nazirliyinin mətbuat xidmətindən Turan-a bildirilib ki, bununla bağlı onlarda məlumat yoxdur, çünki sahibkarlar yardım üçün müraciət etməyiblər.

Öz növbəsində “Baku Steel Company” (BSC) ünvanına olan ittihamları rədd edir və baş verənlərə bağlı olmadığını bildirir.

“Ahmed-Atahan”  Azərbaycan-Türkiyə birgə müəssisəsinin həmtəsisçisi Nazim Məmmədov  bildirib ki, polad tökmə və emal sahəsində bizneslə məşğul olan 20-dən çox müəssisə BSC-nin hücumundan zərər çəkib.  

“BSC-nin baş direktoru Rasim Məmmədov rəqibləri ilə görüş zamanı bildirib ki, baş verənlər ölkə rəhbərliyinin xəbəri olmadan baş vermir”. 

N.Məmmədov qeyd edib ki, hüquq-mühafizə orqanları tərəfindən pozuntuların araşdırılmasının nəticələri barədə məlumat yoxdur.   O həmçinin bildirib ki, metalyayma bazarında qeyri-sağlam rəqabət hələ bir il yarım bundan əvvəl, Dövlət Gömrük Komitəsinin köməyi ilə BSC-nin metalyayma sexləri tərəfindən ferroərintinin ölkə ərazisinə gətirilməsinə mane olduğu vaxtdan başlayıb.

Turan İA Sahibkar Təşkilatları Milli Konfederasiyasına müraciət edərək baş verənlərlə bağlı öz mövqeyini bildirməyi xahiş edib. Konfederasiyanın baş katibi səlahiyyətlərinin icraçısı Mehman Mehmanov deyib ki,  sahibkarlar münaqişənin yoluna qoyulması üçün bu təşkilata müraciət etməyiblər və “odur ki, yalnız bununla bağlı öz mövqeyini bildirə bilərəm”. “Hesab edirəm ki, sahibkarlıq subyektlərinin fəaliyyətinə rəqabət aparan digər kommersiya strukturunun qanunsuz müdaxiləsi sahibkarlıq və qeyr-neft sektorunun inkişafı barədə dövlət strategiyasına ziddir, ölkədə biznes  mühitinə kölgə salır”, - o bildirib.

M. Mehmanov hesab edir ki, istənilən halda sahibkarların konstitusiya hüquqları qorunmalıdır və əgər cinayət tərkibi olarsa, günahkarlar cinayət məsuliyyətinə cəlb olunmalıdır.  08B