Əbülfəz Elçibəyin zəhərlənməsi ilə bağlı cinayət işi başlanıb

Bakı Şəhər Prokurorluğunda mərhum eks-prezident Əbülfəz Elçibəyin zəhərlənməsi ilə bağlı cinayət işi başlanıb. Respublika Baş Prokurorluğunun mətbuat xidməti Turan-ın sorğusuna cavabda aşağıdakıları bildirib: “Sabiq ölkə prezidenti Əliyev Əbülfəz Qədirqulu oğlunun qəsdən zəhərlənməsi barədə Müasir Müsavat Partiyasının sədri Hafiz Hacıyevin müraciəti Bakı Şəhər Prokurorluğunda araşdırılıb.

Araşdırma zamanı H. Hacıyev və digərləri Ə.Əliyevin ölümündən əvvəl zəhərləndirilməsi, bununla əlaqədar onun səhhətinin pisləşməsi barədə məlumat əldə etdiklərini və həmin qanunsuz əməlin qəsdən törədilməsinə kifayət qədər ehtimalların olduğunu bildiriblər. 

Toplanmış material üzrə şəhər prokurorluğunda Cinayət Məcəlləsinin 29, 120.1-ci (qəsdən adam öldürməyə cəhd) maddəsi ilə cinayət işi başlanıb.

Hazırda iş üzrə zəruri istintaq tədbirləri davam etdirilir və nəticəsi barədə ictimaiyyətə əlavə məlumat veriləcək”.  

H.Hacıyevin ağlına bu fikrin nə zaman gəlməsi və Elçibəyin zəhərlənməsində kimdən şübhələnməsi  açıqlanmır. Maraqlıdır ki, eks prezident 2000-ci ildə onkoloji xəstəlikdən vəfat edib.O, Türkiyədə müalicə olunurdu. İndiyədək hakimiyyət Elçibəyin zəhərlənməsi kimi sərsəm fikirləri yada salmırdı, lakin qəflətən xatırladı. Bu ittihamdan kimə qarşı istifadə oluncağını güman etmək çətin deyil – müxalifət liderlərinə qarşı. Bu yolla onları gözdən  salmağa çalışacaqlar. -03B-